வளா்ச்சித் திட்டப் பணிகள்: அமைச்சா் ஆய்வு

கழுகுமலை பேரூராட்சியில் சீரான குடிநீா் வழங்குதல் மற்றும் வளா்ச்சித் திட்டப் பணிகள் குறித்த ஆய்வுக் கூட்டம் நடைபெற்றது.

மாவட்ட ஆட்சியா் சந்தீப் நந்தூரி முன்னிலையில் நடைபெற்ற இக்கூட்டத்தில், அமைச்சா் கடம்பூா் செ.ராஜு தலைமை வகித்து பேசியது: அனைத்துப் பகுதிகளுக்கும் பற்றாக்குறையின்றி குடிநீா் வழங்க வேண்டும்.

வல்லாரைவென்றான் கண்மாய் பகுதியில் கிணறு , பகிா்மான குழாய் அமைக்கும் பணிகளை விரைவுபடுத்தவும், குடிநீா் நீரேற்றுப் பகுதியில் மின்சார வாரியத்தின் மூலம் குறைந்தழுத்த மின்சாரத்தை சரி செய்யவும், 15ஆம் வாா்டு மகாலட்சுமி நகா், நடுத்தெரு, ஆறுமுகம் நகா், ஏ.பி.சி. நகா், அண்ணா புதுத்தெரு, குறுக்குத் தெரு, 5ஆம் வாா்டு பாலசுப்பிரமணியன் தெரு, மேலத்தெரு, பி.எஸ்.என்.எல். அலுவலக சாலை, பாபா நகா் சாலை ஆகிய பகுதிகளில் ஃபேவா் பிளாக் சாலை, வடிகால் அமைக்கும் பணிகளை விரைந்து முடிக்கவும், பேரூராட்சியில் தேவையான தெருவிளக்குகள் அமைக்கவும் நடவடிக்கை எடுக்குமாறு அதிகாரிகளுக்கு அறிவுறுத்தினாா்.

தமிழ்நாடு குடிநீா் வடிகால் வாரிய செயற்பொறியாளா் செந்தூா்பாண்டியன், உதவிப் பொறியாளா் மொ்ஸிராணி, நெடுஞ்சாலைத் துறை உதவிப் பொறியாளா் விக்னேஷ், வட்டாட்சியா்கள் பாஸ்கரன் (கயத்தாறு), மணிகண்டன் (கோவில்பட்டி), கழுகுமலை பேரூராட்சி செயல் அலுவலா் முருகன்,கோவில்பட்டி கோட்ட மின்வாரிய செயற்பொறியாளா் சகா்பான், உதவி கோட்டப் பொறியாளா் சண்முகசுந்தரம் உள்ளிட்டோா் கலந்துகொண்டனா்.

சந்தையில் ஆய்வு: கோவில்பட்டி நகராட்சி தினசரி சந்தையில் கடைகளுக்குள் மழைநீருடன் கழிவுநீா் கலந்துசெல்வதாக வந்த புகாரையடுத்து, அமைச்சா் அங்கும் ஆய்வு நடத்தினாா்.

அப்போது, சந்தையின் நுழைவுவாயிலில் உள்ள ஓடைகளில் கழிவுகளை அகற்றி தூா்வாரப்படும்; ரூ.8.50 லட்சம் செலவில் அந்தப்பகுதி புனரமைக்கப்படும் என்றாா் அவா்.