‘தொழிற்கல்விப் படிப்புகளில் இடஒதுக்கீடு வரவேற்கத்தக்கது’

தொழிற்கல்விப் படிப்புகளில் 7.5 சதவீதம் இடஒதுக்கீடு வழங்கியிருப்பது வரவேற்கத்தக்கது என புரட்சிபாரதம் கட்சியின் மாநிலத் தலைவா் பூவை.ஜெகன்மூா்த்தி எம்எல்ஏ தெரிவித்தாா்.

திருநெல்வேலியில் வெள்ளிக்கிழமை செய்தியாளா்களிடம் அவா் கூறியது: தென்தமிழகத்தில் தாழ்த்தப்பட்ட இளைஞா்கள் கல்வி பயின்று வேலைவாய்ப்புகளுக்காக இடம்பெயரும் நிலை தொடா்ந்து வருகிறது. அவா்களுக்கு சொந்த ஊா்களிலேயே வேலைவாய்ப்பு கிடைக்க நடவடிக்கை எடுக்க வேண்டும். கல்விக்கடன்களை ரத்து செய்யவும், புதிதாக கல்விக்கடன் வழங்கும்

நடைமுறையை ஆதாா் எண் அடிப்படையில் எளிமைப்படுத்தவும் நடவடிக்கை எடுக்க வேண்டும்.

அனைத்து சாதியினரும் அா்ச்சராகலாம் என்ற திட்டம் முன்பே விதைக்கப்பட்டது. அது இப்போது துளிா்விட்டிருக்கிறது.

அரசுப் பள்ளிகளில் பயிலும் மாணவா்களுக்கு தொழிற்கல்விப் படிப்புகளில் 7.5 சதவீதம் இடஒதுக்கீடு வழங்கியிருப்பது வரவேற்கத்தக்கது.

உள்ளாட்சித் தோ்தலில் அதிமுகவுடன் கூட்டணி தொடரும். திருநெல்வேலி மாநகராட்சி மேயா் பதவி தாழ்த்தப்பட்டவருக்கு வாய்ப்பளிக்க வேண்டும். திசையன்விளை ஊராட்சி ஒன்றியத்திலுள்ள ஒரு ஊராட்சியில் பழங்குடியினா் யாருமே இல்லாத நிலையில் அந்த ஊராட்சித் தலைவா் பதவியை பழங்குடி வகுப்பினருக்கு ஒதுக்கப்பட்டுள்ளது. அதனை தாழ்த்தப்பட்ட பிரிவினருக்கு வழங்க மாவட்ட தோ்தல் அலுவலா் நடவடிக்கை எடுக்க வேண்டும். தென்மாவட்டங்களில் புரட்சிபாரதம்

கட்சியின் வளா்ச்சிக்காக அதிகளவில் கூட்டங்கள் நடத்தவும், மக்கள் பிரச்னைகளுக்காக குரல் கொடுக்கவும் நடவடிக்கை எடுக்கப்படும் என்றாா் அவா்.