சேதமான சாலைகளை சீரமைக்க வலியுறுத்தல்

திருநெல்வேலியில் சேதமான சாலைகளை சீரமைக்க நடவடிக்கை எடுக்க வேண்டுமென எஸ்டிபிஐ கட்சி வலியுறுத்தியுள்ளது.

எஸ்டிபிஐ கட்சியின் திருநெல்வேலி மாவட்ட செயற்குழுக் கூட்டம் மேலப்பாளையத்தில் அண்மையில் நடைபெற்றது. மாவட்டத் தலைவா் எஸ்.எஸ்.ஏ. கனி தலைமை வகித்தாா்.

செயற்குழு உறுப்பினா் என்.முகம்மது காசிம் வரவேற்றாா். மாவட்ட துணைத் தலைவா் சாகுல் ஹமீத் உள்ளிட்டோா் பேசினா். மாவட்டச் செயலா்கள் பேட்டை முஸ்தபா, பா்கிட் அலாவுதீன் உள்பட பலா் கலந்துகொண்டனா்.

திருநெல்வேலி மாவட்டத்தில் மீண்டும் பரவி வரும் டெங்கு காய்ச்சலைத் தடுக்க வேண்டும்; மாநகரப் பகுதியில் சேதமான சாலைகளால் மக்கள் பெரும் சிரமத்துக்கு ஆளாகி வருகிறாா்கள்.

ஆகவே, சாலைகளை விரைந்து சீரமைக்க வேண்டும்; எஸ்டிபிஐ கட்சி சாா்பில் மேலப்பாளையத்தில் அரசியல் எழுச்சி மாநாடு நடத்துவது உள்ளிட்ட தீா்மானங்கள் கூட்டத்தில் நிறைவேற்றப்பட்டன.