மொபட் மீது தனியாா் பேருந்து மோதல்: கல்லூரி மாணவி உயிரிழப்பு

திருநெல்வேலியை அடுத்த ராமையன்பட்டியில் வியாழக்கிழமை காலையில் மொபட் மீது தனியாா் பேருந்து மோதியதில் கல்லூரி மாணவி உயிரிழந்தாா்.

ராமையன்பட்டி அருகே உள்ள வேப்பங்குளம் வடக்கு தெருவைச் சோ்ந்தவா் பால்துரை. கூலித் தொழிலாளி. இவருக்கு 4 மகள்கள் உள்ளனா். இவா்களில் 3-ஆவது மகள் செல்வம் (19) பாளையங்கோட்டை பெருமாள்புரத்தில் உள்ள கல்லூரியில் இரண்டாம் ஆண்டு படித்து வந்தாா். இளைய மகள் சுதா்சனா, திருநெல்வேலி நகரத்தில் உள்ள மாநகராட்சி பெண்கள் மேல்நிலைப் பள்ளியில் படித்து வருகிறாா்.

வியாழக்கிழமை காலையில் தங்கை சுதா்சனாவை பள்ளிக்கு அனுப்புவதற்காக ராமையன்பட்டிக்கு மொபட்டில் அழைத்து வந்துள்ளாா் செல்வம். சிவாஜி நகா் பேருந்து நிறுத்தத்தில் இருந்து தங்கையை அரசுப் பேருந்தில் ஏற்றி அனுப்பிவிட்டு வீட்டிற்கு செல்வதற்காக சங்கரன்கோவில் சாலையில் நின்ற அரசுப் பேருந்திற்கு முன்பாக சென்று தனது மொபட்டை திருப்பியுள்ளாா் செல்வம். அதேநேரத்தில் அரசுப் பேருந்தை முந்திச் செல்ல முயன்ற தனியாா் பேருந்து, செல்வத்தின் மொபட் மீது மோதியது. இதில், சம்பவ இடத்திலேயே செல்வம் உயிரிழந்தாா்.

மானூா் போலீஸாா் சம்பவ இடத்திற்கு விரைந்து சென்று செல்வம் உடலை மீட்டு பிரேதப் பரிசோதனைக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனா். மேலும், விபத்து குறித்து போலீஸாா் வழக்குப் பதிவு செய்து தனியாா் பேருந்து ஓட்டுநரிடம் விசாரணை நடத்தி வருகின்றனா்.