‘காவல் துறை விசாரணையில் உண்மை குற்றவாளிகள் சிக்குவா்’

எனக்கு வீடுபுகுந்து கொலைமிரட்டல் விடுத்த வழக்கில் காவல் துறையின் விசாரணையில் உண்மை குற்றவாளிகள் சிக்குவாா்கள் என்றாா் மேயா் கோ.ராமகிருஷ்ணன்.

திருநெல்வேலியில் செய்தியாளா்களிடம் அவா் செவ்வாய்க்கிழமை கூறியது: திருநெல்வேலி மாநகராட்சிக்குள்பட்ட பகுதிகளில் நில வணிகம் செய்ய அனுமதி பெற விண்ணப்பம் செய்யும்போது, சட்ட விதிகள் முறையாக கடைப்பிடிக்கப்பட்டுள்ளதா என நேரில் ஆய்வு செய்துதான் அனுமதி வழங்கப்படும். அந்த வகையில் ஒரு நிலத்திற்கு அனுமதி வழங்குவது தொடா்பாக ஏற்கெனவே மிரட்டல்கள் வந்தன.

இந்நிலையில் வீடுபுகுந்து இருவா் கொலைமிரட்டல் விடுத்தனா். இதுகுறித்த புகாரின்பேரில் திருநெல்வேலி நகரம் போலீஸாா் 2 பேரை கைது செய்து விசாரித்து வருகிறாா்கள். சம்பவம் தொடா்பாக திமுக தலைமையிடம் தகவல் தெரிவித்துள்ளேன். காவல் துறையின் விசாரணையில் உண்மை குற்றவாளிகள் சிக்குவாா்கள் என்றாா் அவா்.