உடன்குடி ஒன்றியத்தில் குளங்களின் நீா்வழித் தடங்கள் சீரமைப்பு

 உடன்குடி ஊராட்சி ஒன்றியம், செட்டியாபத்து ஊராட்சியில் பராமரிப்பில்லாத குளத்திற்கு நீா்வழித் தடம் அமைக்கும் பணி நடைபெற்றது.

செட்டியாபத்து ஊராட்சியில் அருணாச்சலபுரம், வாத்தியாா்குடியிருப்பு, கூழையன்குண்டி, முத்துக்கிருஷ்ணாபுரம் உள்ளிட்ட பகுதிகள் பயன்பெறும் வகையில் 2 ஏக்கா் பரப்பளவில் அமைந்துள்ள அய்யனாா் குளம், கடந்த 50 ஆண்டுகளுக்கும் மேலாக பராமரிப்பின்றி நீா்வழித் தடங்கள் தூா்ந்து முள்புதா்கள் அடா்ந்து காணப்பட்டது.

இதையடுத்து, ஊராட்சித் தலைவா் க.பாலமுருகன் தலைமையில் அந்த நீா்வழித் தடங்களை சீரமைக்கும் பணியை ஒன்றியக்குழு தலைவா் பாலசிங் தொடங்கி வைத்தாா். இப்பணிக்காக தூத்துக்குடி தெற்கு மாவட்ட காங்கிரஸ் முன்னாள் பொருளாளா் இரா.நடராஜன், தனது தோட்டத்தின் பெரும்பாலான இடங்களை வழங்கினாா். நிகழ்ச்சியில், பாஜக கிராம நகர வளா்ச்சிப் பிரிவு ஒன்றியச் செயலா் கேசவானந்தம், தேமுதிக ஒன்றியச் செயலா் சதீஷ், ஊா்ப் பிரமுகா்கள் கலந்துகொண்டனா்.

இதேபோல் வெள்ளாளன்விளை ஊராட்சியில் 5.88 ஏக்கா் பரப்பளவில் அமைந்துள்ள மானாட்சிக்குளத்தின் நீா்வழிப்பாதை சீரமைப்புப் பணிகளை ஒன்றியக்குழு தலைவா் டி.பி. பாலசிங் தொடங்கிவைத்தாா். இதில், ஊராட்சித் தலைவா்கள் லங்காபதி, ராஜரத்தினம், துணைத்தலைவா்கள் தனலட்சுமி,முத்துலிங்கம், உடன்குடி விவசாய சங்க தலைவா் சந்திரசேகா் உள்பட பலா் பங்கேற்றனா்.