கோவில்பட்டி அருகே ஆயுதங்களுடன் சுற்றித் திரிந்த 4 போ் கைது

கோவில்பட்டியையடுத்த சங்கரலிங்கபுரம் பகுதியில் ஆயுதங்களுடன் சுற்றித் திரிந்த 4 பேரை போலீஸாா் வியாழக்கிழமை கைது செய்தனா்.

கோவில்பட்டி பிரதான சாலையில் பொதுமக்களுக்கு அச்சுறுத்தல் ஏற்படுத்தும் வகையில் அரிவாள், வாள் உள்ளிட்ட ஆயுதங்களுடன் மா்ம நபா்கள் சுற்றித் திரிவதாக கிழக்கு காவல் நிலைய போலீஸாருக்கு தகவல் கிடைத்ததாம். அதையடுத்து காவல் துணைக் கண்காணிப்பாளா் உதயசூரியன் மேற்பாா்வையில் கிழக்கு காவல் நிலைய ஆய்வாளா் சுஜித் ஆனந்த் தலைமையில் உதவி ஆய்வாளா் சிலுவை அந்தோணி, தனிப்பிரிவு காவலா் அருண்விக்னேஷ், காவலா்கள் செல்வகுமாா், காளிராஜ் உள்ளிட்ட போலீஸாா் மா்ம நபா்களை தேடும் பணியில் ஈடுபட்டனா்.

இந்நிலையில் கோவில்பட்டியையடுத்த சங்கரலிங்கபுரம் செவக்காடு பகுதியில் சுற்றித் திரிந்த 4 பேரை போலீஸாா் பிடித்து விசாரித்தனா். அவா்கள் கோவில்பட்டி வள்ளுவா் நகரைச் சோ்ந்த காந்தாரிமுத்து மகன் மந்திரமூா்த்தி(29), சங்கரலிங்கபுரம் பகுதியைச் சோ்ந்த முருகன் மகன் கருப்பசாமி(20), கண்ணன் மகன் பரமசிவம் என்ற மந்திரமூா்த்தி(23), கோட்டூா்சாமி மகன் மதன்குமாா்(19) ஆகியோா் என விசாரணையில் தெரியவந்தது. இதுகுறித்து கிழக்கு காவல் நிலைய போலீஸாா் வழக்குப் பதிந்து, அரிவாள், வாள் உள்ளிட்ட ஆயுதங்களுடன் சுற்றித் திரிந்த அவா்களை கைது செய்தனா்.

இதில் மந்திரமூா்த்தி மீது கோவில்பட்டி கிழக்கு மற்றும் மேற்கு காவல் நிலையங்களில் கொலை, கொலை முயற்சி, கஞ்சா விற்பனை, திருட்டு உள்ளிட்ட 19 வழக்குகளும், கருப்பசாமி மீது கிழக்கு காவல் நிலையத்தில் கொலை, கொலை முயற்சி உள்ளிட்ட 3 வழக்குகளும், பரமசிவம் என்ற மந்திரமூா்த்தி மீது கிழக்கு காவல் நிலையத்தில் கொலை, கொலை முயற்சி உள்ளிட்ட 3 வழக்குகளும், மதன்குமாா் மீது கொலை, கொலை முயற்சி உள்ளிட்ட 2 வழக்குகளும் நிலுவையில் உள்ளது என்பது குறிப்பிடத்தக்கது.