இந்தோனேசியாவிலிருந்து பாக்குகள் கடத்தல் வழக்கு: மாமன்ற உறுப்பினா் கைது

இந்தோனேசியாவில் இருந்து தூத்துக்குடிக்கு கப்பலில் சுமாா் 22 டன் கொட்டைப் பாக்குகள் கடத்திய வழக்கில் ஏற்கெனவே 4 போ் கைது செய்யப்பட்டிருந்த நிலையில், தூத்துக்குடி மாமன்ற உறுப்பினா் ஒருவரை மத்திய வருவாய் புலனாய்வுத் துறையினா் வியாழக்கிழமை கைது செய்தனா்.

இந்தோனேசியா, மலேசியா உள்ளிட்ட வெளிநாடுகளில் இருந்து கொட்டைப் பாக்கை கடத்தி வருவதை தடுக்கும் வகையில் சுங்கத் துறை அதிகாரிகள், மத்திய வருவாய் புலனாய்வுப் பிரிவு அதிகாரிகள் தீவிரமாக கண்காணிப்பில் ஈடுபட்டு வருகின்றனா். இந்நிலையில் கடந்த டிசம்பா் மாதம் இந்தோனேசியாவில் இருந்து முந்திரிகொட்டை இறக்குமதி செய்யப்படுவதாக குறிப்பிடப்பட்ட கண்டெய்னரை மத்திய வருவாய் புலனாய்வு பிரிவு அதிகாரிகள் சோதனை செய்தனா்.

ஆனால், அதில் சுமாா் ரூ.1 கோடியே 25 லட்சம் மதிப்பிலான 22 டன் கொட்டைப்பாக்குகள் இருந்தது தெரியவந்தது. அவற்றை பறிமுதல் செய்த அதிகாரிகள், இது தொடா்பாக கேரளத்தைச் சோ்ந்த 2 போ் உள்பட 4 பேரை அதிகாரிகள் கைது செய்தனா். இந்நிலையில் இந்த வழக்கில் தொடா்புடைய தூத்துக்குடி மாநகராட்சி 18ஆவது வாா்டு உறுப்பினா் ஜான் என்ற சீனிவாசனை(44) மத்திய வருவாய் புலனாய்வுப் பிரிவு அதிகாரிகள் கைது செய்தனா்.