தூத்துக்குடி துறைமுகத்தில் 1-ஆம் எண் புயல் எச்சரிக்கை கூண்டு ஏற்றம்

வங்கக் கடலில் உருவான ஆழ்ந்த காற்றழுத்த தாழ்வு நிலை காரணமாக தூத்துக்குடி வ.உ.சி. துறைமுகத்தில் 1-ஆம் எண் புயல் எச்சரிக்கை கூண்டு செவ்வாய்க்கிழமை ஏற்றப்பட்டது.

மத்திய கிழக்கு வங்கக் கடல் பகுதியில் நிலவிய காற்றழுத்த தாழ்வுப் பகுதி ஆழ்ந்த காற்றழுத்த தாழ்வுப் பகுதியாக வலுவடைந்து மத்திய மேற்கு, அதை ஒட்டிய மத்திய கிழக்கு வங்கக் கடல் பகுதியில் நிலைகொண்டுள்ளது. இது, மேலும் வலுவடைந்து காற்றழுத்த தாழ்வு மண்டலமாக மாறும் என வானிலை ஆய்வு மையம் தெரிவித்துள்ளது.

இதன் காரணமாக கடலில் மணிக்கு 50 முதல் 60 கி.மீ. வேகத்தில் பலத்த காற்று வீசக் கூடும் என எச்சரிக்கப்பட்டுள்ளது.

இதையடுத்து, தூத்துக்குடி வ.உ.சி. துறைமுகத்தில் 1-ஆம் எண் புயல் எச்சரிக்கை கூண்டு செவ்வாய்க்கிழமை ஏற்றப்பட்டது. கடலில் மீன்பிடிக்கச் சென்ற மீனவா்கள் பாதுகாப்பாக கரை திரும்புமாறு மீன்வளத் துறை அறிவுறுத்தியுள்ளது. பலத்த காற்று காரணமாக தூத்துக்குடியில் இருந்து மாலத்தீவுக்கு சரக்குகளை ஏற்றிச் சென்ற தோணிகள் மீண்டும் தூத்துக்குடி துறைமுகத்துக்குத் திரும்பின.

துறைமுகத்திலிருந்து விசைப்படகு மீனவா்கள் கடலில் மீன்பிடிக்கச் செல்லவில்லை; 272 விசைப்படகுகளும் கரையில் நிறுத்தப்பட்டன.