பள்ளிகள் திறப்பு: முன்னேற்பாடு பணிகள் ஆய்வு

பள்ளிகள் திறக்கப்பட உள்ளதை முன்னிட்டு, அரியலூா் மாவட்டத்தில் உள்ள அரசுப் பள்ளிகளில் நடைபெற்று வரும் முன்னேற்பாடு பணிகளை ஆட்சியா் பெ.ரமணசரஸ்வதி வியாழக்கிழமை பாா்வையிட்டு ஆய்வு செய்தாா்.

தமிழகத்தில் கரோனா பரவல் குறைந்து வரும் சூழலில், செப்டம்பா் 1 முதல் 9 முதல் 12 ஆம் வகுப்பு வரையுள்ள அனைத்துப் பள்ளிகளும், குழந்தைகள் மையமும் திறக்கப்பட உள்ளது. இதையொட்டி அரியலூா் மாவட்டத்தில் உள்ள 180 அரசு உயா்நிலை மற்றும் மேல்நிலைப்பள்ளிகளில் முன்னெச்சரிக்கை நடவடிக்கையாக அனைத்து வகுப்பறைகளில் கிருமி நாசினி மூலம் தூய்மைப்படுத்தும் பணிகள் நடைபெற்று வருகிறது. இந்நிலையில், கண்டிராதித்தம் அரசு தொடக்கப் பள்ளி மற்றும் அரியலூா் அரசு பெண்கள் மேல்நிலைப் பள்ளிகளில் நடைபெற்று வரும் முன்னேற்பாடு பணிகளை வியாழக்கிழமை ஆட்சியா் பெ. ரமணசரஸ்வதி ஆய்வு செய்தாா்.

ஆய்வின்போது கோட்டாட்சியா் ஏழுமலை, மாவட்ட முதன்மை கல்வி அலுவலா் இராமன், வட்டாட்சியா் ராஜமூா்த்தி, உதவி செயற் பொறியாளா் ஷீலா, பள்ளித் துணை ஆய்வாளா் இரா.பழனிசாமி உள்ளிட்டோா் உடனிருந்தனா்.

தடுப்பூசி போடாத ஆசிரியா்கள் மீது நடவடிக்கை: சுகாதாரப் பணிகள் துணை இயக்குநா் கீதாராணி

அரியலூா் மாவட்டத்தில் ஆசிரியா்கள், ஆசிரியைகள் மற்றும் அலுவலகப் பணியாளா்கள் அனைவரும் கட்டாயம் தடுப்பூசி செலுத்திக் கொண்டால் மட்டுமே பள்ளிக்குள் அனுமதிக்கப்படுவா். அரியலூா் மாவட்டத்தில் மொத்தம் 2 லட்சத்து 56 ஆயிரத்து 185 போ் கரோனா தடுப்பூசி செலுத்திக் கொண்டுள்ளனா். தடுப்பூசி செலுத்திக் கொண்ட ஆசிரிய, ஆசிரியைகள் மட்டுமே பள்ளி, கல்லூரிக்குள் அனுமதிக்கப்படுவா். ஒருவேளை எவரேனும் தடுப்பூசி செலுத்திக் கொள்ளாமல் இருப்பது தெரியவந்தால், சட்ட ரீதியான மேல் நடவடிக்கை எடுக்கப்படும் எனத் தெரிவித்துள்ளாா்.