அரசுப் பேருந்தின் கண்ணாடியை உடைத்த 3 பேர் கைது

குளித்தலையில் அரசுப் பேருந்து கண்ணாடியை உடைத்ததாக 3 பேரைக் கைது செய்த போலீஸார் மேலும் ஒருவரைத் தேடி வருகின்றனர்.
கரூர் மாவட்டம் குளித்தலையில் இருந்து மணப்பாறை நோக்கி அரசு நகரப் பேருந்து ஞாயிற்றுக்கிழமை இரவு சென்று கொண்டிருந்தது. பேருந்து மணப்பாறை சாலையில் உள்ள குளித்தலை ரயில்வே கேட் அருகே சென்றபோது குளித்தலை கோட்டைமேடு பகுதியைச்  சேர்ந்த அஜீத் (23) என்பவர் பேருந்தை நிறுத்தியுள்ளார்.  
அப்போது பேருந்து ஓட்டுநர் பேருந்தை சிறிதுதூரம் தள்ளிச்சென்று நிறுத்தியுள்ளார். இதில் ஆத்திரமடைந்த அஜித், அவரது நண்பர்களும்,  அதே பகுதியைச் சேர்ந்த சசிக்குமார்(22), ராஜசேகர்(19), ஆனந்த் (22) ஆகியோர் சேர்ந்து பேருந்தின் பின்பக்கக் கண்ணாடியை உடைத்ததாகக் கூறப்படுகிறது. புகாரின்பேரில் குளித்தலை போலீஸார் வழக்கு பதிந்து அஜித், சசிக்குமார், ஆனந்த் ஆகியோரைக் கைது செய்தனர். ராஜசேகரை தேடி வருகின்றனர்.