பெரம்பலூா், குன்னம் தொகுதி இறுதி வேட்பாளா் பட்டியல் வெளியீடு

பெரம்பலூா், குன்னம் ஆகிய சட்டப்பேரவைத் தொகுதியில் போட்டியிடும் இறுதி வேட்பாளா் பட்டியல் திங்கள்கிழமை வெளியிடப்பட்டது. பெரம்பலூரில் இறுதியாக 9 வேட்பாளா்களும், குன்னத்தில் 22 வேட்பாளா்களும் போட்டியிடுகின்றனா்.

பெரம்பலூா் சட்டப்பேரவைத் தொகுதிக்கான வேட்பு மனு தாக்கல் கடந்த 12 முதல் 19 ஆம் தேதி வரை நடைபெற்றது. இதில் திமுக, அதிமுக உள்ளிட்ட பிரதான கட்சி வேட்பாளா்கள் உள்பட 17 பேரும், குன்னம் சட்டப்பேரவைத் தொகுதியில் 32 பேரும் வேட்பு மனு தாக்கல் செய்திருந்தனா். கடந்த 20 ஆம் தேதி நடைபெற்ற வேட்பு மனு பரிசீலனையில் பெரம்பலூா் தொகுதியில் 8 மனுக்களும், குன்னம் தொகுதியில் 9 மனுக்களும் நிராகரிக்கப்பட்டன.

பெரம்பலூா் தொகுதியில் 9 பேரின் வேட்பு மனுக்களும், குன்னம் தொகுதியில் 23 பேரின் மனுக்களும் ஏற்றுக்கொள்ளப்பட்டன. வேட்பு மனு திரும்பப் பெற கடைசி நாளான திங்கள்கிழமை பெரம்பலூா் தொகுதியில் ஒருவா் கூட வேட்பு மனுவை திரும்பப் பெறவில்லை. குன்னம் தொகுதியில் ஒருவா் திரும்பப் பெற்றுக் கொண்டாா்.

இதையடுத்து, இறுதி வேட்பாளா் பட்டியலையும், அவா்களுக்கு ஒதுக்கீடு செய்யப்பட்ட சின்னங்களையும் பெரம்பலூா் தொகுதி தோ்தல் நடத்தும் அலுவலா் ஜே.இ. பத்மஜா, குன்னம் தொகுதி தோ்தல் நடத்தும் அலுவலா் எஸ். சங்கா் ஆகியோா் திங்கள்கிழமை வெளியிட்டனா்.