பணி வரன்முறைப்படுத்த செவிலியர்கள் வலியுறுத்தல்

மருத்துவத் தேர்வாணையம் மூலம் பணியமர்த்தப்பட்ட நாளிலிருந்து பணி வரன்முறைப்படுத்த வேண்டும் என செவிலியர் சங்க அமைப்புக் கூட்டத்தில் வலியுறுத்தப்பட்டது.
பெரம்பலூர் மாவட்ட மருத்துவத் தேர்வாணைய செவிலியர்கள் மேம்பாட்டு சங்க அமைப்புக் கூட்டம், பெரம்பலூர் ஊராட்சி ஒன்றிய அலுவலகக் கூட்டரங்கில் ஞாயிற்றுக்கிழமை நடைபெற்றது.
தமிழ்நாடு அரசு ஊழியர் சங்க பெரம்பலூர் மாவட்டத் தலைவர் இரா. சகுந்தலா தலைமை வகித்தார்.   சிறப்பு அழைப்பாளர்களாக பங்கேற்ற மேம்பாட்டு சங்க மாநிலத் தலைவர் க. கோபிநாதன், அரசு ஊழியர்கள் சங்க முன்னாள் மாவட்டத் தலைவர் கே. ஆளவந்தான் ஆகியோர் கோரிக்கைகளை விளக்கினர். கூட்டத்தில், சம வேலைக்கு சம ஊதியம் என்ற அடிப்படையில், இதர செவிலியர்களுக்கு வழங்கப்படுவதைபோல் மருத்துவ தேர்வாணையம் மூலம் பணியமர்த்தப்பட்ட அனைத்து செவிலியர்களுக்கும் பணியமர்த்தப்பட்ட நாளிலிருந்து வழங்க வேண்டும். மருத்துவத் தேர்வாணையம் மூலம் பணியமர்த்தப்பட்ட நாளிலிருந்து பணி வரன்முறைப்படுத்தப்பட வேண்டும். 
பணியிட மாறுதல் கலந்தாய்வின்படி, உடனடியாக அனைவருக்கும் விடுவிப்பு ஆணை வழங்க வேண்டும். அதிக பணிச் சுமைக்கும், மன உளைச்சலுக்கும் தள்ளப்படுவதை தவிர்க்க, காலியிடங்களை நிரப்ப உடனடியாக நடவடிக்கை எடுக்க வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.  அரசு ஊழியர் சங்க மாவட்ட இணைச் செயலர் ராஜ்மோகன், மாவட்ட பொருளாளர் விஷ்ணு, நிர்வாகிகள் ரவி, பன்னீர்செல்வம் உள்பட செவிலியர்கள் பலர் பங்கேற்றனர். 
மாவட்ட செயலர் ஆனந்த் நன்றி கூறினார்.