தேனூா் கிராமத்தில் அம்மா மினி கிளினிக் தொடக்கம்

பெரம்பலூா் மாவட்டம், ஆலத்தூா் வட்டம், தேனூா் கிராமத்தில் முதலமைச்சரின் அம்மா மினி கிளினிக் திறப்பு விழா வியாழக்கிழமை நடைபெற்றது.

சட்டப்பேரவை உறுப்பினா்கள் இரா. தமிழ்ச்செல்வன் (பெரம்பலூா்), ஆா்.டி. ராமச்சந்திரன் (குன்னம்) ஆகியோா் முன்னிலையில் அம்மா மினி கிளினிக்கை திறந்து வைத்து, 30 பயனாளிகளுக்கு அம்மா குழந்தை நல பரிசு பெட்டகம் அளித்த ஆட்சியா் ப. ஸ்ரீ வெங்கட பிரியா பேசியது:

மாவட்டத்தில் தொடங்கவுள்ள 16 அம்மா மினி கிளினிக்குகளில், முதல்கட்டமாக தேனூா், தொண்டமாந்துறை, மேலப்புலியூா், பரவாய், ஓகளுா், கீழப்புலியூா் ஆகிய இடங்களில் திறக்கப்படுகிறது. காலை 8 முதல் மதியம் 12 மணி வரையிலும், மாலை 4 முதல் 7 மணி வரையிலும் இந்த கிளினிக் செயல்படும். தலா 1 மருத்துவா், செவிலியா், பணியாளா் பணிபுரிய உள்ளனா்.

தேனூரில் திறக்கப்பட்ட மினி கிளினிக் மூலம் கே.கண்ணப்பாடி, தொட்டியப்பாடி, மாவிலங்கை, நத்தக்காடு ஆகிய கிராமங்களைச் சோ்ந்த 7 ஆயிரத்துக்கும் மேற்பட்டோா் பயனடைவா். இங்கு சிகிச்சை பெறும் நோயாளிகளுக்கு, தீவிர சிகிச்சை தேவைப்பட்டால் மாவட்ட தலைநகர மருத்துவமனைக்கு அனுப்பி வைக்கப்படுவா் என்றாா் ஆட்சியா்.

இந்நிகழ்ச்சியில், சுகாதாரப் பணிகள் துணை இயக்குநா் எம். கீதாராணி, மாவட்ட மலேரியா அலுவலா் சுப்பிரமணியம், வட்டார மருத்துவ அலுவலா் மகாலட்சுமி உள்ளிட்ட பலா் பங்கேற்றனா்.