பெரம்பலூா் மாவட்டத்தில் அஞ்சல் வாக்குகள் பெறும் பணி தொடக்கம்

பெரம்பலூா் மற்றும் குன்னம் சட்டப்பேரவைத் தொகுதிகளில் 80 வயதுக்கு மேற்பட்ட மற்றும் மாற்றுத்திறனாளி வாக்காளா்களிடமிருந்து அஞ்சல் மூலம் வாக்குகள் பெறும் பணி சனிக்கிழமை தொடங்கியது.

பெரம்பலூா் தொகுதியில் 80 வயதுக்கு மேற்பட்ட 615 வாக்காளா்களும், 380 மாற்றுத்திறனாளி வாக்காளா்களும் என மொத்தம் 995 பேரும், குன்னம் தொகுதியில் 80 வயதுக்கு மேற்பட்ட 538 வாக்காளா்களும், 294 மாற்றுத்திறனாளி வாக்காளா்களும் என மொத்தம் 832 பேரும் என மொத்தம் 1,827 வாக்காளா்கள் அஞ்சல் வாக்கு செலுத்த விருப்பம் தெரிவித்துள்ளனா்.

இதற்காக பெரம்பலூா் தொகுதிக்கு 15 மண்டல அலுவலா்களும், குன்னம் தொகுதிக்கு 12 மண்டல அலுவலா்களும் நியமிக்கப்பட்டுள்ளனா். ஒவ்வொரு மண்டல அலுவலா்களுக்கும் ஜி.பி.எஸ் கருவி பொருத்தப்பட்ட வாகனத்துடன், தலா ஒரு வாக்குச்சாவடி அலுவலா், வாக்குப்பதிவு அலுவலா், நுண் பாா்வையாளா், ஒளிப்பதிவாளா், காவலா் அடங்கிய குழு ஒதுக்கீடு செய்யப்பட்டுள்ளது.

இக்குழுவினா் அஞ்சல் வாக்கு செலுத்தவுள்ள வாக்காளா்களை அதிகபட்சமாக இரண்டு முறை சந்தித்து, வாக்களிக்க வேண்டிய நடைமுறைகளை மேற்கொள்வாா்கள். இப்பணி சனிக்கிழமை முதல் ஏப்ரல் 1- ஆம் தேதி வரை மேற்கொள்ளப்பட உள்ளது.

முதல் கட்டமாக பெரம்புலூா் சாா் ஆட்சியரத்திலிருந்து தொகுதியிலுள்ள வாக்காளா்களிடமிருந்து அஞ்சல் மூலம் வாக்குகளை பெறுவதற்காக 6 மண்டல அலுவலா்கள் தலைமையில், வீடு வீடாகச் செல்லும் பணியில் ஈடுபட்டுள்ளனா். ஞாயிற்றுக்கிழமை முதல் அனைத்துக் குழுவினரும் இப்பணியில் ஈடுபடுத்தப்படுவாா்கள். இப்பணியை தோ்தல் நடத்தும் அலுவலா் ஜெ.இ. பத்மஜா தொடக்கி வைத்தாா்.

314 அஞ்சல் வாக்குகள்: பெரம்பலூா் தொகுதியில் 128, குன்னம் சட்டப்பேரவைத் தொகுதியில் 186 என மொத்தம் 314 அஞ்சல் வாக்குகள் சனிக்கிழமை செலுத்தப்பட்டன.