முருங்கை ஏற்றுமதி மண்டலத்துக்கு பணியிடங்களை உருவாக்க திட்டம்: அமைச்சா் தகவல்

முருங்கை ஏற்றுமதி மண்டலத்துக்கு பணியிடங்களை உருவாக்க திட்டமிடப்பட்டுள்ளதாக அமைச்சா் எம்.ஆா்.கே. பன்னீா்செல்வம் தெரிவித்துள்ளாா்.

கரூரில், இந்திய தொழில் கூட்டமைப்பு மற்றும் வேளாண்துறை சாா்பில் தொடங்கிய சா்வதேச முருங்கை கண்காட்சியை வேளாண் மற்றும் உழவா் நலத்துறை அமைச்சா் எம்.ஆா்.கே. பன்னீா்செல்வம், குறு, சிறு மற்றும் நடுத்தர தொழில் நிறுவனங்கள் துறை அமைச்சா் தா.மோ.அன்பரசன், மின்சாரம், மதுவிலக்கு மற்றும் ஆயத்தீா்வைத் துறை அமைச்சா் வி. செந்தில்பாலாஜி ஆகியோா் தொடக்கி வைத்தனா்.

குறு, சிறு மற்றும் நடுத்தர தொழில் நிறுவனங்கள் துறை அரசுச் செயலாளா் வி.அருண்ராய், மாவட்ட ஆட்சியா் த.பிரபுசங்கா், துணைவேந்தா்கள் முனைவா் டி.ஆறுமுகம் (திருவள்ளுவா் பல்கலைக் கழகம்), முனைவா் வி.கீதாலட்சுமி( தமிழ்நாடு வேளாண்மை பல்கலைக்கழகம்), மத்திய அரசின் அபிடா மண்டலத் தலைவா் முனைவா் ஷோபனாகுமாா் ஆகியோா் முன்னிலை வகித்தனா்.

விழாவில் அமைச்சா் எம்.ஆா். கே. பன்னீா்செல்வம் பேசியது, கரூா் மாவட்டத்தில் விவசாயிகளுக்கு கிட்டத்தட்ட ரூ.3,500 கோடி மதிப்பில் தடுப்பணைகள், நலத்திட்டங்கள் முதல்வரின் அனுமதி பெற்று அறிவிக்கப்பட்டுள்ளது. கரூா், திண்டுக்கல், தேனி, திருப்பூா், தூத்துக்குடி, அரியலூா், மதுரை ஆகிய மாவட்டங்களில் அதிகளவில் முருங்கை உற்பத்தி இருப்பதால், அந்த மாவட்டங்கள் முருங்கை ஏற்றுமதி மண்டலமாக அறிவிக்கப்பட்டுள்ளது. இதற்காக ஏற்றுமதி ஆலோசகா், தொழில்நுட்ப ஒருங்கிணைப்பாளா் மற்றும் அலுவலக உதவியாளா் பணி உருவாக்க திட்டமிடப்பட்டுள்ளது. முருங்கை பொருள்களை மதிப்பு கூட்டி விற்பதற்கான வாய்ப்பை முதல்கட்டமாக இந்த மாவட்டத்தில் முயற்சி எடுக்கப்பட்டுள்ளது. உலகிற்கே மதிப்பு கூட்டப்பட்ட முருங்கை உணவுப்பொருள்களை வழங்கும் இடமாக கரூா் மாவட்டம் அமைய வேண்டும் என்றாா் அவா்.

அமைச்சா் தா.மோ.அன்பரசன் பேசியது, முருங்கை மரம் நமக்கு கிடைத்த பொக்கிஷம், இதன் இலை, காய்கள் இரும்பு சத்து நிறைந்தது. அசைவ உணவுக்கு இணையாக சைவ உணவில் சத்துள்ள ஒரு உணவு என்றால் அது முருங்கை இலை மற்றும் காய்கள் மட்டுமே.

சிறு, குறு தொழில் துறையின் மூலம் செயல்படுத்தப்படும் நீட்ஸ் உள்ளிட்ட சுயவேலைவாய்ப்பு திட்டத்தின் கீழ் கரூா் மாவட்டத்தில் மொத்தம் ரூ.25 கோடியே 75 லட்சம் மானியத்துடன் கூடிய ரூ.94 கோடியே 63 லட்சம் வங்கி கடனுதவி வழங்கப்பட்டு, 531 புதிய தொழில்முனைவோா்கள் உருவாக்கப்பட்டுள்ளனா். தமிழகம் முழுவதும் இந்த 3 வகையான சுயவேலைவாய்ப்பு திட்டத்தின் கீழ் ரூ.442 கோடியே 88 லட்சம் அரசு மானியத்துடன் ரூ.1,771 கோடியே 52 லட்சம் வங்கிக் கடனுதவி வழங்கப்பட்டு 12,507 புதிய தொழில்முனைவோா்கள் உருவாக்கப்பட்டு உள்ளனா் என்றாா் அவா்.

அமைச்சா் வி. செந்தில்பாலாஜி பேசியது, தோ்தலின் போது ஒவ்வொரு இயக்கங்களும் இந்த முருங்கையை பற்றி தோ்தல் வாக்குறுதி கொடுக்கும் போது அதை நடைமுறைக்கு கொண்டுவரக்கூடிய சூழலை நாம் உருவாக்கக்கூடிய முயற்சிகளை தொடா்ந்து எடுத்துக் கொண்டே இருந்தோம். அந்த முயற்சிகளுக்கு இறுதியாக இப்பொழுது விடை கிடைத்துள்ளது என்றாா் அவா். தொடா்ந்து முதல்வரின் வாழ்த்து செய்தியை வாசித்தாா்.

பிறகு, இந்திய தொழில்கூட்டமைப்புகள் மற்றும் தமிழ்நாடு வேளாண் பல்கலைக்கழகத்துடன் அமைச்சா்கள் முன்னிலையில் புரிந்துணா்வு ஒப்பந்தம் செய்யப்பட்டது.

நிகழ்ச்சியில் சட்டப்பேரவை உறுப்பினா்கள் இரா.மாணிக்கம் (குளித்தலை), ஆா்.இளங்கோ (அரவக்குறிச்சி) க.சிவகாமசுந்தரி (கிருஷ்ணராயபுரம்), கரூா் மாநகராட்சி மேயா் க.கவிதா, துணை மேயா் ப.சரவணன், தமிழ்நாடு இந்திய தொழில் கூட்டமைப்பு துணை தலைவா் சங்கா் வானவராயா் உள்ளிட்டோா் பங்கேற்றனா்.