குழந்தைகள் பாதுகாப்பை உறுதிபடுத்த வேண்டும்: ஆலோசனைக் கூட்டத்தில் அறிவுறுத்தல்

குழந்தைகள் பாதுகாப்பை உறுதிபடுத்த வேண்டும் என அனைத்துத் துறை அலுவலா்களுடனான ஆலோசனைக் கூட்டத்தில் அறிவுறுத்தப்பட்டது.

பெரம்பலூா் மாவட்ட ஆட்சியா் அலுவலக கூட்ட அரங்கில், தமிழ்நாடு குழந்தைகள் உரிமைகள் பாதுகாப்பு ஆணையம் சாா்பில் அனைத்துத்துறை அலுவலா்களுடனான ஆலோசனைக் கூட்டம் செவ்வாய்க்கிழமை நடைபெற்றது.

கூட்டத்துக்கு தலைமை வகித்து, தமிழ்நாடு குழந்தைகள் உரிமைகள் பாதுகாப்பு ஆணையத் தலைவா் புதுக்கோட்டை விஜயா பேசியது: தமிழ்நாடு குழந்தைகளின் நலனை கருத்தில்கொண்டு பல்வேறு திட்டங்களை தமிழக அரசு செயல்படுத்தி வருகிறது. இம் மாவட்டத்தில் உள்ள பள்ளிகள் மற்றும் சமூக நீதி விடுதிகளை பாா்வையிட்டு ஆய்வு மேற்கொள்ளப்பட்டது. இதில், மாவட்டத்தில் குழந்தை திருமணம் நடைபெறாமல் தடுக்க கண்காணிப்பை தீவிரப்படுத்தவும், பள்ளிகளில் இடைநின்ற குழந்தைகளைக் கண்டறிந்து பள்ளிகளில் மீண்டும் சோ்க்க வேண்டும் என சம்பந்தப்பட்ட அலுவலா்களுக்கு அறிவுறுத்தப்பட்டுள்ளது.

ஆசிரியா்கள் தனது குழந்தையாக நினைத்து பாடம் கற்பிக்க வேண்டும். குழந்தைகளின் நலனை கருத்தில்கொண்டு, கூட்டு முயற்சியால் குழந்தைகளின் பாதுகாப்பை உறுதிப்படுத்த வேண்டும்.

குழந்தைகளுக்கான உதவி எண் 1098, பெண்களுக்கான உதவி எண் 181, குழந்தைகள் பாதுகாப்பு உதவி எண் 14417 ஆகியவற்றை பள்ளிகள், பேருந்து நிலையங்கள் மற்றும் மக்கள் அதிகளவில் கூடும் இடங்களில் விளம்பரப் படுத்த வேண்டும் என்றாா் அவா்.

கூட்டத்தில், மாவட்ட ஆட்சியா் ஷரண்யா அறி, மாவட்டக் காவல் கண்காணிப்பாளா் வி. லலித்குமாா், ஆணைய உறுப்பினா் வீ. செல்வேந்திரன், மாவட்ட வருவாய் அலுவலா் க. கண்ணன், மதுவிலக்கு அமலாக்கப் பிரிவு கூடுதல் காவல் கண்காணிப்பாளா் பாலமுருகன், மாவட்டக் குழந்தைகள் பாதுகாப்பு அலுவலா் எஸ்.பி. பிரியா உள்ளிட்ட பலா் கலந்துகொண்டனா்.