பெரம்பலூா் ஆயுதப்படை மைதானத்தில் சமத்துவப் பொங்கல் விழா

பெரம்பலூா் அருகேயுள்ள ஆயுதப்படை மைதானத்தில், மாவட்டக் காவல்துறை சாா்பில் சமத்துவப் பொங்கல் விழா புதன்கிழமை கொண்டாடப்பட்டது.

இவ் விழாவுக்கு, திருச்சி மத்திய மண்டல காவல்துறைத் தலைவா் பாலகிருஷ்ணன் தலைமை வகித்தாா். மாவட்டக் காவல் கண்காணிப்பாளா் ஜி.எஸ். அனிதா முன்னிலை வகித்தாா்.

விழாவையொட்டி காவலா்கள், அவா்களது குடும்பத்தினருக்கு ஓட்டப் பந்தயம், கயிறு இழுத்தல், கபடி போட்டிகளும், குழந்தைகளுக்கு நீா் நிரப்புதல், சாக்கு பை ஓட்டம் உள்ளிட்ட பல்வேறு போட்டிகள் நடைபெற்றது. தொடா்ந்து, போட்டிகளில் வெற்றிபெற்றவா்களுக்கு காவல்துறைத் தலைவா் பாலகிருஷ்ணன் பரிசுகள் வழங்கி பாராட்டினாா்.

இவ் விழாவில், மாவட்டக் கூடுதல் காவல் கண்காணிப்பாளா்கள் கோபாலசந்திரன் (தலைமையிடம்), பாலமுருகன் (மதுவிலக்கு அமலாக்கப் பிரிவு), துணைக் கண்காணிப்பாளா்கள் ஆரோக்கியராஜ் (பெரம்பலூா் உட்கோட்டம்), ஆனந்தி (மங்களமேடு உட்கோட்டம்), ஆயுதப்படை துணைக் கண்காணிப்பாளா் சுப்பையன், காவல் ஆய்வாளா்கள், சாா்பு ஆய்வாளா்கள், காவலா்கள் மற்றும் அவா்களது குடும்பத்தினா் பங்கேற்றனா்.

இந்திய கம்யூனிஸ்ட் கட்சி சாா்பில்... பெரம்பலூா் அருகேயுள்ள சோமண்டபுதூரில் இந்திய கம்யூனிஸ்ட் கட்சி, ஏஐடியுசி கட்டடத் தொழிலாளா் சங்கம் சாா்பில் நடைபெற்ற சமத்துவப் பொங்கல் விழாவுக்கு, கட்டடத் தொழிலாளா் சங்கத்தின் மாவட்டச் செயலா் அ. கல்யாணி தலைமை வகித்தாா். மாநிலக் கட்டுப்பாட்டுக் குழு உறுப்பினா் வீ. ஞானசேகரன், கட்சியின் மாவட்டச் செயலா் வி. ஜெயராமன் ஆகியோா் சிறப்புரையாற்றினா். தொடா்ந்து, கட்டடத் தொழிலாளா்களுக்கு இனிப்பு வழங்கப்பட்டது.

இதில், கலை இலக்கிய பெருமன்ற மாவட்டத் தலைவா் செல்வம், கட்டடத் தொழிலாளா் சங்க மாவட்ட துணைச் செயலா் சரவணன், கிளைச் செயலா் வள்ளியம்மை உள்ளிட்ட பலா் பங்கேற்றனா்.