கோமாபுரம் அரசுப் பள்ளியில் மாவட்ட விளையாட்டுப் போட்டிகள்

கந்தர்வகோட்டை ஒன்றியம், கோமாபுரம் அரசு உயர்நிலைப் பள்ளியில் பள்ளிக் கல்வித்துறை சார்பில் மாவட்ட அளவிலான விளையாட்டுப் போட்டிகள் செவ்வாய்க்கிழமை நடைபெற்றது. 
கோமாபுரம் அரசு உயர்நிலைப் பள்ளி விளையாட்டு அரங்கில் நடைபெற்ற நிகழ்ச்சியை மாவட்டக் கல்வி அலுவலர் சாமி. சத்தியமூர்த்தி தேசியக் கொடியை ஏற்றிவைத்து தொடக்கி வைத்தார். முன்னாள் எம்எல்ஏ பே. மாரியய்யா ஒலிம்பிக் கொடியை ஏற்றிவைத்தார். 
முன்னாள் ஒன்றியக் குழு உறுப்பினர் பு.பாண்டியன், முன்னாள் ஊராட்சி மன்றத் தலைவர் எஸ். அண்ணாத்துரை ஆகியோர் முன்னிலை வகித்தனர்.  விளையாட்டு போட்டிகளில் மாவட்டத்தின் பல்வேறு பகுதிகளில் உள்ள அரசுப் பள்ளி மாணவர்கள் கலந்து கொண்டு வென்ற மாணவர்களுக்குப் பரிசுகள் வழங்கப்பட்டன.  முன்னதாக பள்ளி தலைமை ஆசிரியர் வீ. முத்துச்சாமி வரவேற்றார்.  நிகழ்ச்சியில், மாவட்ட உடற்கல்வி அலுவலர் ஆர். தங்கராஜ் , எஸ். ராமச்சந்திரன், சி. ராஜேந்திரன் உள்ளிட்டோர் கலந்து கொண்டனர்.