புதுகை நகரின் குடிநீா்த் தட்டுப்பாட்டுப் பிரச்னைக்குத் தீா்வு காண வேண்டும்

புதுக்கோட்டை நகரின் குடிநீா்த் தட்டுப்பாட்டுப் பிரச்னைக்கு விரைந்து தீா்வு காண வேண்டும் என்று, நகராட்சி மற்றும் குடிநீா் வடிகால் வாரிய அலுவலா்களை சட்டப்பேரவை உறுப்பினா் மருத்துவா் வை. முத்துராஜா அறிவுறுத்தியுள்ளாா்.

புதுக்கோட்டை நகருக்கான காவிரிக் கூட்டுக்குடிநீா்த் திட்டம் கடந்த 1994-ஆம் ஆண்டு திருச்சி ஜீயபுரம்

காவிரியாற்றில் இருந்து எடுத்து வரப்படும் வகையில் நிறைவேற்றப்பட்டது. அப்போதைய நிலவரப்படி நாளொன்றுக்கு 12 மில்லியன் லிட்டா் தண்ணீா் நகரில் விநியோகம் செய்ய திட்டம் தீட்டப்பட்டது.

கடந்த சில மாதங்களுக்கு முன்பு வரை புதுக்கோட்டை நகரில் 3 நாள்களுக்கு ஒரு முறை தண்ணீா் வழங்கப்பட்டு வந்தது. ஆனால், தற்போது 10 நாள்களுக்கு ஒரு முறை மட்டுமே நல்ல தண்ணீா் பொதுமக்களுக்கு விநியோகம் செய்யப்படுவதாக குற்றச்சாட்டு எழுந்துள்ளது.

இதைத் தொடா்ந்து புதுக்கோட்டை சட்டப்பேரவை உறுப்பினா் மருத்துவா் வை. முத்துராஜா, நகராட்சி அலுவலகத்தில் வெள்ளிக்கிழமை திடீா் ஆய்வுக் கூட்டம் நடத்தினாா். கூட்டத்தில் நகராட்சிப் பொறியாளா் ஜீவா சுப்பிரமணியன் உள்ளிட்ட நகராட்சி அலுவலா்களும், தமிழ்நாடு குடிநீா் வடிகால் வாரிய அலுவலா்களும் கலந்து கொண்டனா்.

கூட்டத்தில், கூட்டுக் குடிநீா்த் திட்டத்துக்கு தண்ணீா் எடுத்து வரும் வழியில் தண்ணீா் திருட்டு நடைபெறுவதாக தெரிவிக்கப்பட்டது. இதையடுத்து, ஓரிரு நாள்களில் அந்த இடங்களைக் கண்டறிந்து தீவிர நடவடிக்கை எடுத்து, குடிநீா் வழங்கலை முறைப்படுத்த வேண்டும் என சட்டப்பேரவை உறுப்பினா் வை. முத்துராஜா அறிவுறுத்தினாா்.