நேரடி நெல் கொள்முதல் நிலையம் அமைக்க வலியுறுத்தல்

தஞ்சாவூர் மாவட்டம், பூதலூர் அருகேயுள்ள அலமேலுபுரம் பூண்டியில் நேரடி நெல் கொள்முதல் நிலையம் அமைக்க வேண்டும் என அக்கிராம விவசாயிகள் வலியுறுத்தியுள்ளனர்.
இதுதொடர்பாக தஞ்சாவூரில் உள்ள தமிழ்நாடு நுகர்பொருள் வாணிபக் கழகத்தின் முதுநிலை மண்டல மேலாளர் அலுவலகத்தில் புதன்கிழமை அலமேலுபுரம் பூண்டி கிராம விவசாயிகள் ஆர். ராமதாஸ் மற்றும் வழக்குரைஞர் வெ. ஜீவகுமார் தலைமையில் அளித்த மனு: அலமேலுபுரம் பூண்டி கிராமத்தில் ஆழ்குழாய் மூலம் சுமார் 300 ஏக்கரில் கோடை நெல் சாகுபடி செய்யப்பட்டு, அறுவடைக்கு தயார் நிலையில் உள்ளது. 
ஆனால், விவசாயிகளை வியாபாரிகள் ஏமாற்றி மிகவும் குறைந்த விலைக்கு நெல்லை வாங்குகின்றனர். இதனால், விவசாயிகளுக்கு பெரும் நஷ்டம் ஏற்படுகிறது. 
விவசாயிகளைக் காப்பாற்றும் விதமாக அப்பகுதியில் அரசு நேரடி நெல் கொள்முதல் நிலையத்தைத் திறக்க வேண்டும். அவ்வாறு செய்தால் விவசாயிகள் ஓரளவுக்குப் பயனடைவர். எனவே, நெல் கொள்முதல் நிலையத்தைத் திறக்க ஏற்பாடு செய்ய வேண்டும் என தெரிவித்துள்ளனர்.