குடந்தை அருகே அமரர் ஊர்தி - சுற்றுலா வேன் நேருக்கு நேர் மோதி விபத்து:18 பேர் காயம்

கும்பகோணம் அருகே சுற்றுலா வேனும், அமரர் ஊர்தியும் புதன்கிழமை இரவு நேருக்கு நேர் மோதி கொண்டதில் 2 ஓட்டுநர்கள் உள்பட 18 பேர் பலத்த காயமடைந்தனர்.
சாலை விபத்தில் இறந்த திருப்பனந்தாள் அருகே உள்ள கீழக்காட்டூரைச் சேர்ந்த பாலசுப்ரமணியன் மகன் நவீன்குமாரின் (23) உடலுடன் அமரர் ஊர்தி ஒன்று தஞ்சாவூர் மருத்துவ கல்லூரி மருத்துவமனையிலிருந்து கீழக்காட்டூர் நோக்கிச் சென்று கொண்டிருந்தது.
அதேநேரம், கும்பகோணத்தை அடுத்த கள்ளப்புலியூர் காந்தி நகர் பகுதியைச் சேர்ந்த 15-க்கும் மேற்பட்டோருடன் சுற்றுலா வேன் ஒன்று திருவள்ளியங்குடியில் நடைபெற்ற திருமண வரவேற்பு நிகழ்ச்சிக்கு சென்றுவிட்டு,  மீண்டும் கள்ளப்புலியூர் நோக்கி வந்து கொண்டிருந்தது.
சுற்றுலா வேனும், அமரர் ஊர்தியும் கள்ளப்புலியூர் தனியார் கல்லூரி அருகே வந்து கொண்டிருந்தன. அப்போது,  அப்பகுதியில் லேசான மழை பெய்து கொண்டிருந்த நிலையில்,  கும்பகோணத்தைச் சேர்ந்த சரவணன் (28) என்பவர் ஓட்டி வந்த சரக்கு வாகனம் (டாடா ஏஸ்) அமரர் ஊர்தியை முந்த முயன்றதாகக் கூறப்படுகிறது. அப்போது நிலைதடுமாறிய சரக்கு வாகனம் அமரர் ஊர்தியிலும், சுற்றுலா வாகனத்திலும் மோதி திரும்பியுள்ளது. இதில் தடுமாறிய சுற்றுலா வேன், அமரர் ஊர்தி வாகனங்கள் நேருக்கு நேர் மோதிக் கொண்டன. இந்த விபத்தில் சுற்றுலா வேன் ஓட்டுநர் மோகன் (37), அமரர் ஊர்தி ஓட்டுநர் அன்பழகன் (35), 2 வேன்களிலும் இருந்த பயணிகள் காந்தி நகரைச் சேர்ந்த சந்தோஷ் மனைவி மாதவி (21),  ராமச்சந்திரன் (35), சுரேந்தர் (25), தமிழரசி (40), தினேஷ் (21), காளிதாஸ் மனைவி சங்கீதா (25), மகாராணி (32), பட்டுசாமி (22),  கோகுல் (22), கண்ணன் (45), ஜெயமணி (40), கோமதி (26), அமர்நாத் (18), கல்யாணி (55), செந்தமிழ்செல்வன் (48), டாடா ஏஸ் ஓட்டுநர் சரவணன் ஆகிய 18 பேர் படுகாயமடைந்தனர்.
 சம்வபத்தைப் பார்த்த பொதுமக்கள் போலீஸாருக்கு தகவல் கொடுத்ததுடன், காயமடைந்தவர்களை மீட்டு ஆம்புலன்ஸ் மூலம் கும்பகோணம் அரசு மருத்துவமனையில் சிகிச்சைக்காக அனுமதித்தனர். இதுகுறித்து தாலுகா போலீஸார் வழக்கு பதிந்து, விசாரித்து வருகின்றனர்.