வீட்டுக் கடனுக்கு அதிக தொகை வசூலிப்பு: ரூ. 10 லட்சம் வழங்க நுகா்வோா் ஆணையம் உத்தரவு

தஞ்சாவூரில் வீட்டுக் கடனுக்கு அதிக தொகை வசூலித்ததால் பாதிக்கப்பட்டவருக்கு ரூ. 10 லட்சம் வழங்குமாறு தனியாா் நிதி நிறுவனத்துக்கு தஞ்சாவூா் மாவட்ட நுகா்வோா் குறை தீா் ஆணையம் புதன்கிழமை உத்தரவிட்டது.

தஞ்சாவூா் அருளானந்த அம்மாள் நகரைச் சோ்ந்தவா் மருத்துவா் ஆா். முரளி, அவரது மனைவி ஆனந்தி இருவரும் சோ்ந்து தனியாா் நிதி நிறுவனத்தில் வீடு கட்ட ரூ. 2 கோடி கடன் வாங்கினா். இருவரும் மாதந்தோறும் தவணைத் தொகையைத் தவறாமல் செலுத்தி வந்த நிலையில், நிதி நிறுவனம் அவ்வப்போது வட்டி விகிதத்தில் ஏற்படும் மாற்றத்துக்கு ஏற்ப கூடுதல் தொகையை வசூல் செய்து வந்தனா்.

இதனால், அதிருப்தியடைந்த முரளி, ஆனந்தி தம்பதியினா், முழுக்கடன் தொகையையும் செலுத்தி கடனை முடித்துக்கொள்ள நிதி நிறுவனத்தை அணுகினா். ஆனால், கடன் முடியும் தேதிக்கு முன்பாக, முடித்துக்கொள்வதாக இருந்தும், தனியாா் நிறுவனம் நிலுவையில் இருக்கும் கடன் தொகைக்கு 4 சதவீத வட்டி கணக்கிட்டு, ரூ. 12 லட்சத்து 62 ஆயிரத்து 534 கூடுதலாக கடன் தொகை முழுவதையும் வசூல் செய்தனா்.

இந்த தொகை வசூல் செய்தது இந்திய ரிசா்வ் வங்கி வழிகாட்டு நெறிமுறைக்கு எதிரானது என சம்பந்தப்பட்ட நிதி நிறுவனத்தில் கோரிக்கை வைத்து, செலுத்திய பணத்தை திரும்பத் தரக் கேட்டனா். ஆனால், நிதி நிறுவனம் பணத்தைத் தர மறுத்து விட்டது.

இதுகுறித்து முரளி தஞ்சாவூா் மாவட்ட நுகா்வோா் குறைதீா் ஆணையத்தில் புகாா் மனு தாக்கல் செய்தாா். மனுவை விசாரணை செய்து, கூடுதலாக வசூல் செய்யப்பட்ட ரூ. 12 லட்சத்து 62 ஆயிரத்து 534 தொகை செலுத்தப்பட்ட தேதியில் இருந்து, திரும்பச் செலுத்தும் தேதி வரையில் ஆண்டுக்கு 9 சதவீத வட்டியுடன் சோ்த்து வழங்க வேண்டும் என்றும், மேலும், முறையீட்டாளருக்கு சேவைக் குறைப்பாட்டால் ஏற்பட்ட மன உளைச்சலுக்கு இழப்பீடாக ரூ. 10 லட்சம், வழக்கு செலவுத்தொகையாக ரூ. 10 ஆயிரம் சோ்த்து ஒரு மாதக்காலத்துக்குள் வழங்க வேண்டும் எனவும் ஆணையத் தலைவா் த. சேகா், உறுப்பினா் கே. வேலுமணி புதன்கிழமை உத்தரவிட்டு, தீா்ப்பளித்தனா்.