10-ஆம் வகுப்பு தேர்வில் குறைந்த மதிப்பெண்: மாணவி தற்கொலை

பத்தாம் வகுப்பு பொதுத்தேர்வில் குறைந்த மதிப்பெண் எடுத்ததால் திருச்சியைச் சேர்ந்த மாணவி தூக்கிட்டுத் தற்கொலை செய்து கொண்டார்.
திருச்சி, தென்னூரை அடுத்த சேஷசாயிபுரத்தைச் சேர்ந்தவர் ஜெயக்குமார். இவரது மனைவி ரத்தினவள்ளி. இவர்களது மகள் விஜயலட்சுமி (16). 10-ஆம் வகுப்பு தேர்வு எழுதியிருந்தார். கணவர் இறந்த பிறகு, வீட்டு வேலை செய்து குடும்பத்தை நடத்தி வந்த ரத்தினவள்ளி, தனது மகளை படிப்பில் கவனம் செலுத்தவும், தேர்வில் அதிக மதிப்பெண் பெற வேண்டும் என ஊக்குவித்து வளர்த்து வந்துள்ளார்.
இந்நிலையில், அண்மையில் வெளியான 10-ஆம் வகுப்பு பொதுத் தேர்வு முடிவில் 500-க்கு 446 மதிப்பெண் பெற்றிருந்தார். இதையடுத்து, தனது தாய் எதிர்பார்த்தபடி அதிக மதிப்பெண் பெறவில்லையே என்ற விரக்தியில் இருந்த விஜயலட்சுமி, புதன்கிழமை இரவு தூக்கிட்டுத் தற்கொலை செய்து கொண்டார்.
இதுதொடர்பாக, தில்லைநகர் போலீஸார் வழக்குப் பதிவு செய்து விசாரணை நடத்தி வருகின்றனர்.