புரட்டாசி சனிக்கிழமைகளில்  பெருமாள்மலைக்கு  இரு சக்கர வாகனத்தில் செல்லத் தடை

பெருமாள்மலையில் புரட்டாசி சனிக்கிழமை உற்சவ விழாவின் போது இரு சக்கர வாகனத்தில் மலையேற தடை விதிக்கப்பட்டுள்ளது.
புரட்டாசி சனிக்கிழமைகளில் பெருமாள்மலை பிரசன்ன வெங்கடாசலபதி கோயிலில் நடைபெறும் உற்சவ விழா தொடர்பாக அனைத்துத் துறை அலுவலர்கள் பங்கேற்ற ஆலோசனைக் கூட்டம் துறையூரில் வட்டாட்சியர் பு.ரவிசங்கர் தலைமையில் புதன்கிழமை நடைபெற்றது. இதில், கடை ஒப்பந்தாரர்கள், சுற்றுலா வேன் உரிமையாளர், ஓட்டுநர் சங்க பிரதிநிதிகள் ஆகியோர் பங்கேற்றனர்.
புரட்டாசி சனிக்கிழமைகளில் பக்தர்கள் கூட்டம் அதிகளவில் வரும் என்பதால் இரு சக்கர வாகனத்தில் மலையேற, நெகிழிப் (பிளாஸ்டிக்) பைகள் பயன்படுத்த தடை விதிக்க முடிவு செய்யப்பட்டது, மேலும் சுற்றுலா வேனில் மலையேற ரூ.30, இறங்க ரூ.20 கட்டணம் நிர்ணயம் செய்தும், ஒரு நடைக்கு 12 பக்தர்களை மட்டுமே வேனில் ஏற்றிச் செல்ல வேன் ஓட்டுநர்களுக்கு கட்டுப்பாடு விதிக்கப்பட்டது. 
சனிக்கிழமைகளில் மின்தடை செய்யக்கூடாது. சுத்தமான குடிநீர், கழிவறை பராமரிப்பை ஒன்றிய, நகராட்சி நிர்வாகம் செய்ய வேண்டும். துறையூரிலிருந்து பெருமாள்மலை அடிவாரத்துக்கு போதுமான அளவில் பேருந்து வசதி செய்ய வேண்டும். மொட்டையடிக்கும் பணியாளர்கள் மது அருந்தி பணியில் ஈடுபடுவதையும்,  கோயிலுக்குள் கடை அமைப்பதை அறநிலைத்துறையினர் தடை செய்யவேண்டும். அன்னதானம் செய்வோர் உணவு பாதுகாப்பு அலுவலரிடம் முன் அனுமதி பெற வேண்டும் உள்ளிட்டவை குறித்து கூட்டத்தில் முடிவு செய்யப்பட்டது.