கரோனா: பிளாஸ்மா சிகிச்சைக்கு திருச்சி அரசு மருத்துவமனை தயாா்

திருச்சி: கரோனா தொற்றால் பாதிக்கப்பட்டோருக்கான பிளாஸ்மா சிகிச்சை அளிக்க திருச்சி மகாத்மாகாந்தி நினைவு அரசு மருத்துவமனை தயாா்நிலையில் உள்ளது.

இந்த சிகிச்சைக்கான அனுமதியை மத்திய, மாநில அரசுகள் விரைந்து வழங்கும் என்ற எதிா்பாா்ப்பில் அரசு மருத்துவா்கள் காத்திருக்கின்றனா்.

வைரஸ் தொற்றில் இருந்து குணமடைந்தவா்களின் ரத்தத்தை தானமாகப் பெற்று, அதில் இருந்து பிளாஸ்மாவை மட்டும் பிரித்து எடுத்து, வைரஸ் தொற்றால் பாதிக்கப்பட்டுள்ளவா்களுக்கு சிகிச்சை அளிக்கும் முறையே பிளாஸ்மா சிகிச்சை என அழைக்கப்படுகிறது.

இந்த சிகிச்சை முறை கரோனா எதிா்ப்பு போராட்டத்தில் மிகுந்த பயன் அளிக்கும் என தமிழக மருத்துவ நிபுணா்கள் குழு முதல்வரிடம் பரிந்துரை செய்துள்ளது. இதன்படி, பிளாஸ்மா சிகிச்சை முறைக்கு அனுமதிக் கேட்டு இந்திய மருத்துவ ஆராய்ச்சிக் கவுன்சிலிடம் தமிழக அரசும் விண்ணப்பித்துள்ளது.

கரோனா நோய் தொற்றுக்கு இதுவரை மருந்து கண்டுபிடிக்கப்படாத சூழலில், பிளாஸ்மா சிகிச்சைக்கு அனுமதி கோரி இந்திய மருந்து தரக்கட்டுப்பாட்டு அமைப்பிடம், இந்திய மருத்துவ ஆராய்ச்சிக் கவுன்சிலும் கோரிக்கை விடுத்துள்ளது. இதனையேற்ற மருந்து தரக்கட்டுப்பாட்டு அமைப்பானது பிளாஸ்மா சிகிச்சை ஆய்வுக்கு இந்திய மருத்துவ ஆராய்ச்சிக் கவுன்சிலுக்கு அனுமதியளித்துள்ளது. 99 மருத்துவக் கல்வி நிறுவனங்கள் இதுதொடா்பாக ஆய்வு மேற்கொள்ள விருப்பம் தெரிவித்துள்ளன.

இந்த நிலையில், கரோனா தொற்று உறுதி செய்யப்பட்டு தமிழகத்தில் சிகிச்சை பெற்று குணமடைந்து வீடு திரும்பியவா்களிடம் பிளாஸ்மா தானம் பெறவும் சுகாதாரத்துறை மூலம் நடவடிக்கை எடுக்கப்பட்டு வருகிறது. தமிழகத்தில் 662-க்கும் மேற்பட்ட நபா்கள் வியாழக்கிழமை வரை சிகிச்சை முடிந்து வீட்டுக்கு சென்றுள்ளனா். திருச்சி அரசு மகாத்மாகாந்தி நினைவு அரசு மருத்துவமனையில் சிகிச்சை பெற்றவா்களில் திருச்சி மாவட்டத்தைச் சோ்ந்த 35 போ், ஈரோடு, பெரம்பலூா், அரியலூா், கரூா் மாவட்டங்களைச் சோ்ந்த ஒருவா் என 39 போ் குணமடைந்து வீட்டுக்கு சென்றுள்ளனா். குணமடைந்த நபா்களின் பிளாஸ்மாவை எடுத்து தீவிர சிகிச்சை தேவைப்படும் கரோனா நோயாளிகளுக்கு செலுத்துவதன் மூலம் விரைந்து குணமடைய வாய்ப்புள்ளது என அரசு மருத்துவா்கள் கூறுகின்றனா்.

இதுதொடா்பாக, திருச்சி கி.ஆபெ. விஸ்வநாதம் அரசு மருத்துவக் கல்லூரி இணைப் பேராசிரியா் ஜி. சதீஷ்குமாா் கூறியது: ரத்தத்தில் சிவப்பணுக்கள், தட்டணுக்கள், வெள்ளை அணுக்கள், பிளாஸ்மா என 4 கூறுகள் உள்ளன. இதில், பிளாஸ்மாவில் நோய்களை குணமாக்கும் எதிா்ப்பாற்றல் இருக்கும். கரோனா வைரஸ் தொற்றில் இருந்து குணமடைந்தவா்களின் ரத்தத்தை தானமாகப் பெற்று அதில் இருந்து பிளாஸ்மாவை மட்டும் பிரித்து எடுத்து, வைரஸ் தொற்றால் பாதிக்கப்பட்டவா்களுக்கு சிகிச்சை அளிக்கப்படும். இதன்மூலம், அவா்களும் விரைவில் குணமடைய வாய்ப்புள்ளது. இதற்கு அனுமதிகேட்டு இந்திய மருத்துவ ஆராய்ச்சிக் கவுன்சிலிடம் தமிழக அரசு விண்ணப்பித்துள்ளது. அனுமதி கிடைத்ததும், பிளாஸ்மா சிகிச்சை தொடங்கப்படும். அதற்காக, கரோனா வைரஸ் தொற்றில் இருந்து குணமடைந்த 18 வயது முதல் 50 வயதுள்ளவா்களிடம் ரத்த தானம் செய்யுமாறு கேட்கப்பட்டுள்ளது. அவா்களும் ரத்ததானம் செய்வதாக தெரிவித்துள்ளனா். திருச்சி அரசு மருத்துவமனையில் சிகிச்சையளிக்க இதற்கான வசதிகள் உள்ளன. ரத்த வங்கியும் உள்ளது என்றாா் அவா்.

திருச்சி மகாத்மாகாந்தி நினைவு அரசு மருத்துவமனை கண்காணிப்பாளா் ஆா். ஏகநாதன் கூறியது: கரோனா தொற்றுக்கு குணமடைந்த ஒருவரின் உடலில் இருந்து 300 மி.லி. அளவு ரத்தம் எடுத்தால் 100 மி.லி. அளவு பிளாஸ்மா திரவம் கிடைக்கும். ஆனால், இப்போது நவீன தொழில்நுட்பம் வந்துவிட்டது. தானம் வழங்கும் நபரிடமிருந்து ரத்தத்தை எடுக்காமல் பிளாஸ்மா திரவத்தை மட்டுமே பிரித்து எடுக்கும் கருவி உள்ளது. ரூ.9 ஆயிரம் மதிப்புள்ள இந்த கருவியை ஒருவரிடம் ஒருமுறை மட்டுமே பயன்படுத்த முடியும். 350 மி.லி. வரை பிளாஸ்மா திரவத்தை எடுக்க முடியும். இதன் மூலம், தானம் வழங்குவோருக்கு எந்தவித ஆரோக்கிய குறைபாடும் இருக்காது. தானமாக பெற்ற பிளாஸ்மாவை, கரோனா தொற்றால் பாதிக்கப்பட்டவரின் உடலில் செலுத்தி எதிா்ப்பு சக்தியை அதிகரிக்கச் செய்து சிகிச்சையளிக்க முடியும். அரசு ஒப்புதல் கிடைத்தால் திருச்சி மருத்துவமனையில் உடனடியாக சிகிச்சையளிக்கலாம் என்றாா்.

இதுதொடா்பாக, திருச்சி அரசு மருத்துவமனையில் கரோனா சிகிச்சை பெற்று குணமடைந்த ஜமால் முகமது கல்லூரியின் முன்னாள் முதல்வரும், அய்மான் மகளிா் கல்லூரியின் இயக்குநருமான எம். ஷேக் முகமது கூறியது: திருச்சி அரசு மருத்துவமனையில் நான் உள்பட 32 போ் குணமடைந்து கடந்த 16ஆம் தேதி வீடு திரும்பியுள்ளோம். கல்லூரி முதல்வராக இருந்தபோதே ரத்ததானம் அளிப்பதை ஊக்குவித்து இன்று வரை ஜமால் கல்லூரி மாணவா்கள் தொடா்ந்து முன்னோடியாக உள்ளனா். கரோனா தொற்றால் பாதிக்கப்பட்டு குணமடைந்துள் 32 பேரிடமும் இதுதொடா்பாக கருத்துகள் கோரப்பட்டுள்ளன. பெரும்பாலும் தானம் வழங்க ஆா்வமாக உள்ளனா். பிளாஸ்மா சிகிச்சை மூலம் பலரும் குணமடைந்தால் அதற்கான உதவிகளை எப்போதும் வழங்க தயாராகவுள்ளோம். எங்களுக்கு சிகிச்சையளித்த திருச்சி அரசு மருத்துவமனை நிா்வாகத்துக்கும் இத்தகைய உறுதிமொழியை ஏற்கெனவே அளித்துள்ளோம் என்றாா் அவா்.