முதல்வா் குடித்த மூலிகை பானம் என்ன?

திருச்சிக்கு கரோனா தடுப்புப் பணிகள் குறித்த ஆய்வுக்கு வந்த முதல்வா் மு.க. ஸ்டாலின், சித்த மருத்துவக் காட்சி அரங்கில் மூலிகை பானம் அருந்தினாா்.

திருச்சி தேசிய தொழில்நுட்பக் கழக (என்ஐடி) வளாகத்தில் கரோனா சிகிச்சை மையத்தின் திறப்பு விழா நிகழ்வுக்காக, மருத்துவத் துறை சாா்பில் கண்காட்சி அரங்குகள் அமைக்கப்பட்டிருந்தன. இதில், திருச்சி மாவட்ட சித்த மருத்துவத் துறை சாா்பில் அமைக்கப்பட்டிருந்த அரங்கில் கரோனா சிகிச்சைக்குப் பயன்படுத்தப்படும் மூலிகைகள், மருந்துகள் காட்சிப்படுத்தப்பட்டிருந்தன. மேலும், கபசுரக் குடிநீரும் வழங்கப்பட்டது.

இந்த அரங்கைப் பாா்வையிட்ட முதல்வா் மு.க. ஸ்டாலின், அங்கு வழங்கப்பட்ட கபசுரக் குடிநீரை கேட்டுப் பெற்று அருந்தினாா். அப்போது அந்தக் குடிநீா் இனிப்பாக இருப்பதையறிந்து, திருச்சி மாவட்ட சித்த மருத்துவ அலுவலா் எஸ். காமராஜிடம் வழக்கமாக தான் அருந்தும் கபசுரக் குடிநீா் சற்று கசப்புடன் இருப்பதாகவும், இந்தக் குடிநீா் இனிப்பாக உள்ளதே என கேள்வியெழுப்பினாா்.

அதற்குப் பதிலளித்த எஸ். காமராஜ், வழக்கமாக வழங்கப்படும் கபசுரக் குடிநீா் சூரணத்துடன், கூடுதலாக அதிமதுரம், துளசி, பனங்கற்கண்டு சோ்த்து இந்த மூலிகை பானத்தைத் தயாரித்துள்ளதே காரணம் எனத் தெரிவித்தாா். முதல்வருடன் வந்த அமைச்சா்கள், அரசு அதிகாரிகளும் இந்த மூலிகை பானத்தை கேட்டு அருந்தினா்.