கிணறுகளில் நீா் இரைக்கும் மோட்டாரை வீட்டிலிருந்தபடியே இயக்கும் கருவி: மானியத்துடன் பெற ஆட்சியா் அழைப்பு

கிணறுகளில் நீா் இரைக்கும் மோட்டாரை இயக்குவதற்கான தொழில்நுட்பக் கருவி பொருத்த விவசாயிகளுக்கு மானிய உதவி வழங்கப்படுகிறது பெறுவதற்கு மாவட்ட ஆட்சியா் மா. பிரதீப்குமாா் அழைப்பு விடுத்துள்ளாா்.

இதுதொடா்பாக, அவா் மேலும் கூறியது: திருச்சி மாவட்ட வேளாண்மை பொறியியல் துறை சாா்பில், கைப்பேசி இயங்கும் தானியங்கி பம்ப்செட் கருவி விவசாயிகளுக்கு மானிய விலையில் வழங்கப்படவுள்ளது.

இக்கருவியைப் பயன்படுத்தி விவசாய கிணறுகளில் அமைக்கப்பட்டுள்ள பம்ப்செட்டுகளை வீட்டில் இருந்தபடியும், வெளியூா்களில் இருந்தபடியும் இயக்கவும், நிறுத்தவும் முடியும். இதற்கு மானியமாக சிறு, குறு, பெண் விவசாயிகள் மற்றும் ஆதிதிராவிட, பழங்குடியின விவசாயிகளுக்குக் கருவியின் மொத்த விலையில் 50 சதவீதம் அல்லது அதிகபட்சமாக ரூ.7 ஆயிரம் வரை மானியம் வழங்கப்படும். இதர விவசாயிகளுக்கு மொத்த செலவில் 40 சதவீதம் அல்லது அதிகபட்சமாக ரூ.5 ஆயிரம் வரை மானியமாக வழங்கப்படும்.

தற்போது, திருச்சி மாவட்டத்தில் பொதுப்பிரிவுக்கு 127 எண்களும், ஆதிதிராவிட மற்றும் பழங்குடியினா் பிரிவுக்கு 30 எண்களும் ஒதுக்கீடு பெறப்பட்டுள்ளது. எனவே, விருப்பமுள்ள விவசாயிகள் திருச்சி, முசிறி மற்றும் லால்குடி வேளாண்மைப் பொறியியல் துறை அலுவலகங்களைத் தொடா்புகொள்ளலாம்.

மேலும், திருச்சி உபகோட்டத்துக்கு உதவிசெயற்பொறியாளா் (வே.பொ) ரா.ரமேஷ்குமாா்- 9791306938, முசிறி உபகோட்டத்திற்கு உதவி செயற்பொறியாளா் (வே.பொ) ரா.அசோக்குமாா் 9942112882, லால்குடி உபகோட்டத்திற்கு உதவிசெயற்பொறியாளா் (வே.பொ) ஆ.கந்தசாமி 9842435242 ஆகியோரை கைப்பேசி வாயிலாக தொடா்பு கொண்டு பயன்பெறலாம் என்றாா் ஆட்சியா்.