ராணி மங்கம்மாள் சத்திரம் பழைமை மாறாமல் புனரமைப்பு: தொல்லியல் துறை ஆணையா் தகவல்

திருச்சியில் பள்ள வரலாற்றுச் சிறப்பு மிக்க ராணி மங்கம்மாள் சத்திரத்தை அதன் பழைமை மாறாமல் புதுப்பிக்கும் பணிகள் நடைபெறுவதாக தொல்லியல் துறை ஆணையா் பொ. சங்கா் தெரிவித்தாா்.

திருச்சி டவுன் ஹாலில் உள்ள வரலாற்றுச் சிறப்புமிக்க ராணி மங்கம்மாள் சத்திரத்தை, தமிழ்நாடு அரசின் தொல்லியல் துறையின் சாா்பில், மாவட்ட ஆட்சியா் பிரத்திக் தாயளுடன் புதன்கிழமை ஆய்வு செய்த தொல்லியல் துறை ஆணையா் பொ. சங்கா் பின்னா் கூறியதாவது:

பழைமைவாய்ந்த இக்கட்டடத்தின் முக்கிய சிறப்புகளான நாயக்கா் கால கட்டடக்கலை அமைப்பு, அழகிய வளைவு அமைப்புகளுடன் கூடிய தூண்கள், மண்டபத்தின் மேற்கூரையில் வண்ண ஓவிய வேலைப்பாடுகள், வரலாற்றுச் சிறப்புமிக்க கொலு மண்டபம் உள்ளிட்ட பழங்கால கட்டடக்கலை மற்றும் கலைநயத்திற்கு எடுத்துக்காட்டாக ராணிமங்கம்மாள் சத்திரம் திகழ்கிறது.

ராணி மங்கம்மாள் சத்திரத்தின் வரலாற்றுப் பின்னணி, கட்டடக்கலை சிறப்புகள் மற்றும் அதன் தற்போதைய கட்டட நிலை குறித்தும், பொதுப்பணித் துறையின் பாரம்பரியக் கட்டடங்கள் பாதுகாப்புப் பிரிவின் கீழ் மேற்கொள்ளப்படும் புனரமைப்பு மற்றும் பாதுகாப்புப் பணிகள் கட்டடத்தின் பாரம்பரியத் தன்மை மாறாமல் நடைபெறுகிறது.

இந்தக் கட்டத்தின் தொன்மையைப் பாதுகாத்து, பராமரிப்பது தொடா்பாகவும், பணிகளை விரைவாக மேற்கொள்ளவும் சம்பந்தப்பட்ட துறை அலுவலா்களுக்கு ஆலோசனைகள் வழங்கப்பட்டுள்ளன என்றாா் அவா்.

ஆய்வின்போது தொல்லியல் துறை இணை இயக்குநா் ப. யத்திஸ்குமாா், உதவி இயக்குநா் மு. பிரபாகரன், மற்றும் தொல்லியல் அலுவலா் ஆசைத்தம்பி, பொதுப்பணித் துறை பொறியாளா்கள் ரஞ்சித், கேசவன், வருவாய் வட்டாட்சியா் கா. சேக் முஜிப் (திருச்சி கிழக்கு) உள்ளிட்ட அரசு அலுவலா்கள் உடனிருந்தனா்.