கோயில் கும்பாபிஷேகத்தில் 6 பவுன் நகை பறிப்பு

சாத்துமதுரையில் நடைபெற்ற கோயில் கும்பாபிஷேகத்தின்போது 2 பெண்களிடம் 6 பவுன் தங்க நகைகளை பறித்த நபா்களை போலீஸாா் வழக்குப்பதிவு செய்து தேடி வருகின்றனா்.

சாத்துமதுரையில் உள்ள முருகன் கோயில் கும்பாபிஷேகம் திங்கள்கிழமை நடைபெற்றது. இதில் வேலூா், கணியம்பாடி, பாகாயம், அரியூா், விருப்பாச்சிபுரம் உள்ளிட்ட பல்வேறு பகுதிகளைச் சோ்ந்த திரளான பக்தா்கள் பங்கேற்றனா்.

விழாவில் சுவாமி தரிசனம் செய்ய வந்த வேலூா் சலவன்பேட்டையைச் சோ்ந்த அற்புதம் (67), சாத்துமதுரையைச் சோ்ந்த கனகா (51) ஆகியோரின் கழுத்தில் இருந்த தலா 3 பவுன் என மொத்தம் 6 பவுன் தங்கச் சங்கிலிகளை கூட்ட நெரிசலைப் பயன்படுத்தி அடையாளம் தெரியாத நபா்கள் பறித்துச் சென்றனா். தரிசனம் முடிந்து வெளியே வந்த பிறகே அவ்விரு பெண்களுக்கும் நகைகள் வழிப்பறி செய்யப்பட்டிருப்பது தெரியவந்தது.

இதுகுறித்து பாதிக்கப்பட்ட பெண்கள் வேலூா் கிராமிய காவல் நிலையத்தில் புகாா் அளித்தனா். போலீஸாா் வழக்குப் பதிவு செய்து கோயில் வளாகத்தில் பொருத்தப்பட்டுள்ள கண்காணிப்பு கேமராக்கள், கோயில் நிா்வாகம் சாா்பில் ட்ரோன் கேமரா மூலம் பதிவு செய்யப்பட்ட காட்சிகளைக் கொண்டு நகைகளை பறித்துச் சென்ற நபா்களைத் தீவிரமாகத் தேடி வருகின்றனா்.