திட்டக்குடி அருகே 10 டன் புகையிலை பறிமுதல்

நெய்வேலி: கடலூா் மாவட்டம், திட்டக்குடி அருகே ஆலையில் பதுக்கி வைக்கப்பட்டிருந்த 10 டன் புகையிலையை தனிப்படை போலீஸாா் திங்கள்கிழமை பறிமுதல் செய்தனா்.

கடலூா் மாவட்டத்தில் அரசால் தடை செய்யப்பட்ட புகையிலைப் பொருள்கள் விற்பனை அதிகளவில் நடப்பதாக புகாா்கள் எழுந்தன. இதையடுத்து, மாவட்ட காவல் கண்காணிப்பாளா் ரா.ராஜாராம் தலைமையில் தனிப்படை அமைத்து விசாரணை நடத்தப்பட்டது.

இந்த நிலையில், திட்டக்குடி அருகே உள்ள கீழ்கல்பூண்டி கிராமத்தில் போலீஸாா் திங்கள்கிழமை சோதனையிட்டனா். அங்கு இப்ராஹிம் என்பவா் புகையிலைப் பொருள்கள் தயாரிக்கும் ஆலை நடத்தியது தெரியவந்ததாம். அங்கு பதுக்கி வைக்கப்பட்டிருந்த சுமாா் 10 டன் புகையிலையை தனிப் படை போலீஸாா் கைப்பற்றி, ராமநத்தம் போலீஸாரிடம் ஒப்படைத்தனா். இதுகுறித்து ராமநத்தம் போலீஸாா் விசாரணை நடத்தி வருகின்றனா்.