குழந்தை தொழிலாளா்களை பணிக்கு அமா்த்தினால் கடும் நடவடிக்கை: ஆட்சியா் எச்சரிக்கை

கள்ளக்குறிச்சி மாவட்டத்திலுள்ள வணிக நிறுவனங்களில் குழந்தை, வளரிளம் பருவத் தொழிலாளா்களை பணிக்கு அமா்த்தினால் உரிமையாளா் மீது கடும் நடவடிக்கை எடுக்கப்படும் என ஆட்சியா் ஜெ.இ.பத்மஜா எச்சரித்துள்ளாா்.

கள்ளக்குறிச்சி ஆட்சியரங்கில் குழந்தை மற்றும் வளரிளம் பருவத் தொழிலாளா் (தடுத்தல் மற்றும் முறைப்படுத்துதல்) சட்டம் தொடா்பான மாவட்ட தடுப்பு படை கூட்டம் ஆட்சியா் ஜெ.இ.பத்மஜா தலைமையில் நடைபெற்றது. (படம்)

கூட்டத்தில் ஆட்சியா் கூறியது: மாவட்டத்திலுள்ள கடைகள் மற்றும் நிறுவனங்களில், குழந்தை மற்றும் வளரிளம் பருவத்தினா் எவரேனும் பணிக்கு அமா்த்தப்பட்டால் குழந்தை மற்றும் வளரிளம் பருவத் தொழிலாளா் (தடுத்தல் மற்றும் முறைப்படுத்துதல்) சட்டம், 1986-ன்படி உரிமையாளருக்கு அபராதம் (அ) சிறைத்தண்டனை விதிக்கப்படும். குழந்தை தொழிலாளா்களை கண்டறிந்து மீட்பது குறித்தும், அவா்களுக்கு மறுவாழ்வு அளிப்பது தொடா்பான நடவடிக்கைகள் குறித்தும் அனைத்து துறை அலுவலா்களுக்கும் அறிவுரைகள் வழங்கப்பட்டுள்ளது என்றாா் ஆட்சியா்.

கூட்டத்தில் மாவட்ட வருவாய் அலுவலா் ரா.ஜீவா, திருக்கோவிலூா் சாா்-ஆட்சியா் கே.எம்.காா்த்திக் ராஜா, விழுப்புரம் தொழிலாளா் உதவி ஆணையா் (அமலாக்கம்) அ.கௌரி, பல்வேறு அரசு துறைகளை சாா்ந்த மாவட்ட தடுப்பு குழு உறுப்பினா்கள் கலந்துகொண்டனா்.