நிலத்தடி நீர்மட்டத்தை உயர்த்துவது குறித்து ஆய்வு செய்வது அவசியம்: துணைவேந்தர்

நிலத்தடி நீர் மட்டத்தை உயர்த்துவது குறித்து ஆய்வு செய்வது அவசியம் என்று புதுவை பல்கலைக்கழகத் துணைவேந்தர் குர்மீத் சிங் கூறினார். 
 புதுவை மத்திய பல்கலைக்கழத்தில் "ஆராய்ச்சியாளர்களை வளப்படுத்துதல்' என்ற தலைப்பில் பத்து நாள்கள் நடைபெறும் பயிலரங்கம் புதன்கிழமை தொடங்கியது. பயிலரங்கை தொடக்கி வைத்து குர்மீத் சிங் பேசியதாவது:
சமூக அறிவியல் பிரிவில் ஆராய்ச்சியாளர்கள் தீவிரம் காட்ட வேண்டும்.  ஏனெனில், இந்தியாவில் ஒரு மாறுபட்ட கால நிலை நிலவுகிறது. ஒரு பகுதியில் வறட்சியாகவும் மற்றொரு பகுதியில் வெள்ளமும் ஏற்படுகிறது.  இந்த நிலையற்ற கால நிலையில் நிலத்தடி நீரை நாடு முழுவதும் எப்படி அதிகரிக்கலாம் என்பதை ஆராய்ச்சியாளர்கள் தொடர்ந்து ஆய்வு செய்ய வேண்டும் என்றார் அவர். முன்னதாக, பல்கலை. கல்வியியல் புல முதன்மையரும்,  துறைத் தலைவருமான மும்தாஜ் பேகம் வரவேற்றார். சமூக அறிவியியல் துறையின் புல முதன்மையர் வெங்கட்ட ரகோத்தம் வாழ்த்திப் பேசினார். தில்லி பல்கலைக்கழகத்தின் அரசியலியல் பேராசிரியர் குர்மீத் கெளர் சிறப்பு விருந்தினராகப் பங்கேற்று பேசினார். சமூக அறிவியியல் துறைப் பேராசிரியர்கள் பாலமுருகன்,  செல்லமணி உள்பட பலர் பங்கேற்றனர்.