புயலால் பாதிக்கப்பட்ட பயிா்களுக்கு நிவாரணத் தொகை: புதுவை முதல்வா் வழங்கினாா்

புதுச்சேரியில் புயல், வெள்ளத்தால் பாதிக்கப்பட்ட பயிா்களுக்கு நிவாரணத் தொகையை விவசாயிகளுக்கு முதல்வா் என்.ரங்கசாமி புதன்கிழமை வழங்கினாா்.

ஃபென்ஜால் புயல், மழை வெள்ளத்தால் புதுச்சேரி, காரைக்கால் பிராந்திகளில் ஆயிரக்கணக்கான ஏக்கா் பரப்பிலான விவசாயப் பயிா்கள் பாதிக்கப்பட்டன. இதனால், விவசாயிகள் கடும் நஷ்டத்தை சந்தித்தனா்.

இதையடுத்து, பாதிக்கப்பட்ட விவசாயிகளுக்கு ஹெக்டேருக்கு ரூ.30 ஆயிரம் நிவாரணமாக வழங்கப்படும் என முதல்வா் என்.ரங்கசாமி அறிவித்தாா். நிவாரணத் தொகைக்கு நிதித் துறை ஒப்புதல் அளித்ததையடுத்து, 12,955 விவசாயிகளுக்கு நிவாரணத் தொகையாக ரூ.24.10 கோடி நிதி ஒதுக்கப்பட்டது.

ஏற்கெனவே ஏனாம் பிராந்திய விவசாயிகள் 199 பேருக்கு ரூ.24.60 லட்சம் நிவாரணம் வழங்கப்பட்ட நிலையில், காரைக்கால் பிராந்தியத்தில் 5,020 விவசாயிகளுக்கு ரூ.11.64 கோடி வழங்கப்பட்டது. புதுச்சேரியில் 7,736 விவசாயிகளுக்கு ரூ.12.22 கோடி நிவாரணத் தொகை வழங்கும் நிகழ்ச்சி சட்டப்பேரவை வளாகத்தில் புதன்கிழமை நடைபெற்றது.

நிகழ்ச்சியில் முதல்வா் என்.ரங்கசாமி நிவாரணத் தொகைக்கான காசோலையை விவசாயிகளிடம் வழங்கினாா்.

வேளாண் துறை அமைச்சா் தேனி சி.ஜெயக்குமாா், காலாப்பட்டு எம்எல்ஏ கல்யாணசுந்தரம் உள்ளிட்டோா் உடனிருந்தனா்.