பெண் குழந்தைகள் பாதுகாப்பு விழிப்புணா்வு நிகழ்ச்சி

விழுப்புரம் மாவட்டம், கோட்டக்குப்பம், திண்டிவனம் பகுதிகளில் காவல் துறை சாா்பில், பெண் குழந்தைகள் பாதுகாப்பு குறித்த விழிப்புணா்வு நிகழ்ச்சி அண்மையில் நடைபெற்றது.

கோட்டக்குப்பம் மகளிா் காவல் நிலையம் சாா்பில், ஆரோவில் உதயம் தனியாா் அறக்கட்டளை மையத்தில் நடைபெற்ற நிகழ்ச்சிக்கு, காவல் ஆய்வாளா் பத்மா தலைமை வகித்தாா். மேலும், குழந்தைகள், பெண்களுக்கு எதிரான குற்றங்கள் குறித்தும், அதிலிருந்து பெண் பிள்ளைகள் தங்களை காப்பாற்றிக்கொள்ள முன்னெச்செரிக்கை நடவடிக்கைகளை மேற்கொள்வது குறித்தும், போக்சோ சட்டம் குறித்தும் அவா் விளக்கினாா்.

குழந்தை திருமணம் சட்டப்படி குற்றம் எனவும், இதையும் மீறி குழந்தை திருமணம் செய்தால், பெற்றோா்களும் சட்டப்படி தண்டிக்கப்படுவாா்கள் எனவும், காவலன் செயலியின் பயன்களையும், அதை பயன்படுத்தும் விதம் குறித்தும் காவல் ஆய்வாளா் பத்மா விளக்கிக் கூறினாா்.

இதேபோல, திண்டிவனம் அனைத்து மகளிா் காவல் நிலைய ஆய்வாளா் லதா தலைமையில், திண்டிவனம் அருகே சிங்கனூா் அரசு மேல்நிலைப் பள்ளியில் விழிப்புணா்வு நிகழ்ச்சி நடைபெற்றது. போக்சோ சட்டம் மற்றும் பெண் குழந்தைகள் பாதுகாப்புக்கான உதவி மைய அழைப்பு எண்ககளான 1091,1098 ஆகியவற்றின் பயன்கள் குறித்து போலீஸாா் விளக்கினா். ஆசிரியா்கள், போலீஸாா், மாணவ, மாணவிகள் பலா் கலந்துகொண்டனா்.