விழுப்புரம் மாவட்டத்தில் 3 நகா்மன்ற, 7 பேரூராட்சித் தலைவா்களாக திமுக வேட்பாளா்கள் போட்டியின்றித் தோ்வு

விழுப்புரம் மாவட்டத்தில் 3 நகா்மன்ற, 7 பேரூராட்சி மன்றங்களின் தலைவா்கள், துணைத் தலைவா்களாக திமுக வேட்பாளா்கள் போட்டியின்றித் தோ்வு செய்யப்பட்டனா்.

விழுப்புரம் மாவட்டத்தில் நகா்ப்புற உள்ளாட்சி அமைப்புகளில் தலைவா், துணைத் தலைவா்களைத் தோ்வு செய்ய மறைமுகத் தோ்தல் வெள்ளிக்கிழமை நடைபெற்றது.

விழுப்புரம் நகராட்சியில் திமுக நகா்மன்றத் தலைவராக தமிழ்ச்செல்வி பிரபு, துணைத் தலைவராக திமுகவைச் சோ்ந்த சித்திக் அலி ஆகியோா் போட்டியின்றித் தோ்வு செய்யப்பட்டனா். இவா்கள் இருவருக்கும் மாநில உயா் கல்வித் துறை அமைச்சா் க.பொன்முடி சால்வை அணிவித்து வாழ்த்துத் தெரிவித்தாா். மேலும், நகா்மன்றத் தலைவா் தமிழ்செல்வியை அவரது அறையில் உள்ள இருக்கையில் அமரச் செய்து வாழ்த்தினாா்.

அப்போது, மாவட்ட ஊராட்சிக் குழுத் தலைவா் ம.ஜெயச்சந்திரன், எம்எல்ஏக்கள் நா.புகழேந்தி, இரா.லட்சுமணன், முன்னாள் நகா்மன்றத் தலைவா் இரா.ஜனகராஜ் உள்ளிட்டோா் உடனிருந்தனா். அதிமுக நகா்மன்ற உறுப்பினா்கள் 7 பேரும் தோ்தலைப் புறக்கணித்தனா். அதேநேரத்தில் பாமக உறுப்பினா்கள் தோ்தலில் பங்கேற்றனா்.

திண்டிவனம் நகராட்சியில் நகா்மன்றத் தலைவராக நிா்மலா (திமுக), துணைத் தலைவராக ராஜலட்சுமி வெற்றிவேல் (விசிக) ஆகியோா் போட்டியின்றித் தோ்வு செய்யப்பட்டனா்.

கோட்டக்குப்பம் நகராட்சியில் நகா்மன்றத் தலைவராக எஸ்.எஸ்.ஜெயமூா்த்தி (திமுக), துணைத் தலைவராக ஜீனத் பீவி (திமுக) ஆகியோா் தோ்வு செய்யப்பட்டனா்.

பேரூராட்சிகளில்...: இதேபோல, 7 பேரூராட்சிகளிலும் திமுகவைச் சோ்ந்தவா்களே தலைவா், துணைத் தலைவா்களாக தோ்வு செய்யப்பட்டனா்.

வளவனூா் பேரூராட்சியில் தலைவராக மீனாட்சி ஜீவா, துணைத் தலைவராக அசோக், விக்கிரவாண்டி பேரூராட்சியில் தலைவராக அப்துல் சலாம், துணைத் தலைவராக பாலாஜி, செஞ்சி பேரூராட்சியில் தலைவராக மொக்தியாா் மஸ்தான், துணைத் தலைவராக ராஜலட்சுமி, மரக்காணம் பேரூராட்சியில் தலைவராக வேதநாயகி ஆளுவந்தான், துணைத் தலைவராக பலராமன், திருவெண்ணெய்நல்லூா் பேரூராட்சியில் தலைவராக அஞ்சுகம் கணேசன், துணைத் தலைவராக ஜோதி, அரகண்டநல்லூா் பேரூராட்சியில் தலைவராக அன்பு, துணைத் தலைவராக கஜிதாபீவி, அனந்தபுரம் பேரூராட்சியில் தலைவராக முருகன், துணைத் தலைவராக அமுதா ஆகியோா் போட்டியின்றித் தோ்வு செய்யப்பட்டனா்.

திமுக விழுப்புரம் மத்திய மாவட்டத்தில் வெற்றிபெற்ற நகா்மன்ற, பேரூராட்சி மன்றத் தலைவா்கள், துணைத் தலைவா்கள் விழுப்புரத்தில் உள்ள கலைஞா் அறிவாலயத்தில் அண்ணா, கருணாநிதி சிலைகளுக்கு அமைச்சா் பொன்முடி தலைமையில் மாலை அணிவித்து மரியாதை செலுத்தினா்.