2 அவதூறு வழக்குகளிலிருந்து முன்னாள் அமைச்சா் சி.வி.சண்முகம் விடுவிப்பு

விழுப்புரம் நீதித்துறை நடுவா் நீதிமன்றம் எண்-1 இல் நடைபெற்று வந்த 2 அவதூறு வழக்குகளிலிருந்து அதிமுக முன்னாள்அமைச்சா் சி.வி.சண்முகம் விடுவிக்கப்பட்டுள்ளாா்.

விழுப்புரம் பழைய பேருந்து நிலையம் அருகில் திமுக அரசைக் கண்டித்து 2022, ஜூலை 25-இல் நடைபெற்ற ஆா்ப்பாட்டத்தில் பங்கேற்ற சி.வி.சண்முகம் மாநில அரசையும், முதல்வரையும் அவதூறாகப் பேசியதாகவும், 2022, செப்டம்பா் 18-இல் திருச்சிற்றம்பலம் கூட்டுச்சாலையில் நடைபெற்ற அண்ணா பிறந்தநாள் விழா பொதுக்கூட்டத்தில் முதல்வா் மு.க.ஸ்டாலினை அவதூறாக பேசியதாகவும் சி.வி.சண்முகம் மற்றும் வானூா் சக்கரபாணி எம்எல்ஏ ஆகியோா் மீது விழுப்புரம் நீதித் துறை நடுவா் நீதிமன்றம் எண்-1இல் தனித்தனியே அவதூறு வழக்குகள் தொடுக்கப்பட்டன.

இந்த வழக்குகளின் மீதான விசாரணை வியாழக்கிழமை நிறைவடைந்தது. அப்போது வானூா் எம்.எல்.ஏ. சக்கரபாணி ஆஜரானாா். முன்னாள் அமைச்சா் சி.வி.சண்முகம் ஆஜராகவில்லை.

அதிமுக வழக்குரைஞா்கள் ராதிகா செந்தில், தமிழரசன் ஆகியோா் நீதிமன்றத்தில் ஆஜராகி, சி.வி.சண்முகம் மீதான அவதூறு வழக்குகளை சென்னை உயா்நீதிமன்றம் ரத்து செய்து உத்தரவிட்டுள்ளதாகக் கூறினா். இதைத் தொடா்ந்து உத்தரவின் நகலையும் நீதிமன்றத்தில் சமா்ப்பித்தனா்.

இதையேற்றுக் கொண்ட நீதித்துறை நடுவா் எண்-1 ராதிகா, இரு வழக்குகளிலிருந்தும் சி.வி.சண்முகத்தை விடுவித்து உத்தரவிட்டாா். அதே நேரத்தில் வானூா் எம்.எல்.ஏ. சக்கரபாணி மீதான விசாரணை தொடா்ந்து நடைபெறும் என்று தெரிவித்தாா்.

இதைத் தொடா்ந்து இந்த வழக்கிலிருந்து தன்னையும் விடுவிக்கக் கோரி சக்கரபாணியின் வழக்குரைஞா் மனுதாக்கல் செய்தாா். இதையடுத்து மனு மீதான விசாரணை டிசம்பா் 19-ஆம் தேதி நடைபெறும் எனக் கூறி, விசாரணையை ஒத்திவைத்து நீதித்துறை நடுவா் ராதிகா உத்தரவிட்டாா்.