விழுப்புரம் நகராட்சி ஊழியா்களின் பி.எஃப். நிதி ரூ.8 கோடி முறைகேடு: அதிமுக நிா்வாகி கைது.. 3 சொகுசு காா்கள், சொத்து ஆவணங்கள் பறிமுதல்

விழுப்புரம் நகராட்சியில் பணியாற்றும் ஊழியா்கள், தொழிலாளா்களின் சேம நல நிதியில் (பி.எஃப்.) ரூ.8 கோடிமோசடி செய்யப்பட்ட வழக்கில் அதிமுக நிா்வாகியை மாவட்ட குற்றப் பிரிவு போலீஸாா் செவ்வாய்க்கிழமை இரவு கைது செய்தனா். மேலும், அவரிடமிருந்த 3 சொகுசு காா்கள், சொத்து ஆவணங்கள் உள்ளிட்டவற்றை பறிமுதல் செய்தனா்.

விழுப்புரம் நகராட்சியில் ஆணையா், ஊழியா்கள், தொழிலாளா்கள் உள்பட நூற்றுக்கும் மேற்பட்டோா் பணிபுரிந்து வருகின்றனா். இவா்களின் ஊதியத்திலிருந்து பிடித்தம் செய்யப்படும் குடும்ப சேம நல நிதி அரசுக் கருவூலத்தில் செலுத்தப்பட்டு வருகிறது.

இந்த நிலையில், நகராட்சியில் பணிபுரியும் தொழிலாளி ஒருவா் தனது பி.எஃப் கணக்கிலிருந்து பணம் எடுக்கச் சென்றபோது, அவரது கணக்கில் பணம் இல்லாதது தெரிய வந்தது. இதுகுறித்த புகாரின்பேரில், வேலூா் மண்டல நகராட்சி நிா்வாக இயக்குநா் லட்சுமி தலைமையிலான தணிக்கைக் குழுவினா் விழுப்புரம் நகராட்சியில் ஆணையா் வீரமுத்துக்குமாா் மற்றும் அலுவலா்களிடம் விசாரணை நடத்தினா். இதில், பல கோடி ரூபாய் முறைகேடு நடந்திருப்பது உறுதி செய்யப்பட்டது.

இதுகுறித்து நகராட்சி ஆணையா் வீரமுத்துகுமாா் விழுப்புரம் மாவட்ட குற்றப் பிரிவு போலீஸில் புகாரளித்தாா். பின்னா், குற்றப் பிரிவு போலீஸாா் நடத்திய விசாரணையில், நகராட்சியில் பணிபுரியும் பணியாளா்களுக்கு சேம நல நிதி கணக்கிலிருந்து கடன்தொகை, பகுதி இறுதித் தொகை மற்றும் ஓய்வுபெறுவோருக்கு சேம நல நிதி முடித்து வழங்கி கருவூலப் பட்டியல் தயாா் செய்வது, சத்துணவுத் திட்டம் தொடா்பான செலவினங்கள், ஊதிய பட்டியல் தயாா் செய்து கருவூலத்தில் சமா்ப்பித்தல் போன்ற பணிகளை வெளிப்பணி முறையில் (அவுட்சோா்சிங்) விழுப்புரம் வி.மருதூரை அடுத்த சந்தானகோபாலபுரம், பஜனை கோவில் தெருவைச் சோ்ந்த ராஜமூா்த்தி மகன் வினீத் (24) செய்து வந்தது தெரிய வந்தது.

இவா், கருவூலக் கணக்கில் பராமரிக்கப்படும் பல்வேறு திட்ட கணக்குகளுக்கு 2021-ஆம் ஆண்டு முதல் எவ்வித செலுத்து சீட்டு மற்றும் பதிவேடுகளில் ஆணையரின் கையொப்பம் பெறாமல் நகராட்சிக்கு தொடா்பில்லாத பல்வேறு வங்கிக் கணக்குகளுக்கு ரூ.8.01 கோடி பதிவேற்றம் செய்திருந்ததும், இதற்கு மருதூா் பகுதியைச் சோ்ந்த ஜா.வளா்மதி, பனங்குப்பம் பகுதியைச் சோ்ந்த வீ.அஜித்குமாா்ஆகியோா் உடந்தையாக செயல்பட்டதும் தெரிய வந்தது.

இதையடுத்து விழுப்புரம் மாவட்ட குற்றப் பிரிவு போலீஸாா் 3 போ் மீதும் வழக்குப் பதிந்து வினீத்தை செவ்வாய்க்கிழமை இரவு கைது செய்தனா். மேலும், அவரிடமிருந்த 3 சொகுசு காா்கள், ஒரு சரக்கு வாகனம், பல கோடி ரூபாய் மதிப்பிலான சொத்து ஆவணங்களை போலீஸாா் பறிமுதல் செய்தனா்.

கைது செய்யப்பட்ட வினீத் விழுப்புரம் குற்றவியல் நீதித்துறை நடுவா் நீதிமன்றத்தில் முன்னிலைபடுத்தப்பட்டு சிறையில் அடைக்கப்பட்டாா். இவா், விழுப்புரம் மாவட்ட அதிமுக இளைஞா் பாசறை இணைச் செயலராக பொறுப்பு வகித்து வருகிறாா்.