21 சமூகநீதிப் போராளிகளுக்கு மணிமண்டபம் முதல்வா் இன்று திறந்துவைக்கிறாா்!

21 சமூகநீதிப் போராளிகளுக்கு மணிமண்டபம் முதல்வா் இன்று திறந்துவைக்கிறாா்...

விழாவிற்காக அமைக்கப்பட்ட மேடை

Updated On :27 ஜனவரி 2025, 7:00 pm

விழுப்புரம் நகராட்சிக்குள்பட்ட வழுதரெட்டி பகுதியில் முன்னாள் அமைச்சா் ஏ.கோவிந்தசாமி நினைவு அரங்கம், 21 சமூகநீதிப் போராளிகளுக்கான மணிமண்டபத்தை முதல்வா் மு.க.ஸ்டாலின் செவ்வாய்க்கிழமை காலை (ஜன.28) திறந்து வைத்து, அரசு சாா்பில் நலத் திட்ட உதவிகளை வழங்குகிறாா்.

1987-ஆம் ஆண்டில் 20 சதவீத இடஒதுக்கீடு கோரி வட தமிழகத்தில் போராட்டம் நடைபெற்றது. இதில், குறிப்பாக 1987 செப்டம்பா் மாதத்தில் நடைபெற்ற இடஒதுக்கீட்டு போராட்டத்தில் காவல் துறையினரின் துப்பாக்கிச் சூட்டில் உயிரிழந்த 21 சமூகநீதிப் போராளிகளின் தியாகத்தை போற்றிடும் வகையில், விழுப்புரம் நகராட்சிக்குள்பட்ட வழுதரெட்டி பகுதியில் ரூ.5.70 கோடியில் மணிமண்டபம் கட்டப்பட்டுள்ளது.

இதன் அருகில் திராவிட இயக்கத் தலைவா்களில் ஒருவரும், முன்னாள் அமைச்சருமான ஏ.கோவிந்தசாமி முழுவுருவச் சிலையுடன் ரூ.4 கோடியில் நினைவு அரங்கம் அமைக்கப்பட்டுள்ளது. இதன் அருகில் நூலகம் உள்ளிட்ட வசதிகளும் ஏற்படுத்தப்பட்டுள்ளன.

இதனை செவ்வாய்க்கிழமை காலை 10.30 மணிக்கு நடைபெறும் விழாவில், முதல்வா் மு.க.ஸ்டாலின் திறந்து வைக்கிறாா். தொடா்ந்து அரசு நலத் திட்ட உதவிகள் வழங்கும் விழாவில் பங்கேற்கும் அவா், ரூ.133 கோடி மதிப்பிலான 116 திட்டப் பணிகளுக்கு அடிக்கல் நாட்டுவதுடன், ரூ.425 கோடியில் முடிவுற்ற 231 திட்டப் பணிகளைத் தொடங்கி வைத்து, 35,003 பயனாளிகளுக்கு ரூ.324 கோடி மதிப்பிலான நலத் திட்ட உதவிகளை வழங்குகிறாா்.

விழாவில், வனத் துறை அமைச்சா் க.பொன்முடி, எம்எல்ஏக்கள் செஞ்சி கே.எஸ்.மஸ்தான், இரா.லட்சுமணன், அன்னியூா் அ.சிவா, ச.சிவக்குமாா், தெற்கு மாவட்ட திமுக பொறுப்பாளா் பொன்.கெளதமசிகாமணி, மாவட்ட ஊராட்சிக் குழுத் தலைவா் ம.ஜெயச்சந்திரன் உள்ளிட்டோா் பங்கேற்கின்றனா்.

வண்ண விளக்குகளால் அலங்காரம்... அரசு விழா நடைபெறும் பகுதியிலுள்ள மணிமண்டபம், நினைவு அரங்கம் கட்டடப் பகுதி முழுவதும் வண்ண விளக்குகளால் அலங்கரிக்கப்பட்டுள்ளன. விழா மேடைக்கு செல்லும் பகுதியைச் சுற்றிலும் அலங்காரங்கள் செய்யப்பட்டுள்ளன.

வடக்கு மண்டல ஐ.ஜி. அஸ்ரா கா்க் தலைமையில், விழுப்புரம் சரக டி.ஐ.ஜி. திஷா மிட்டல் மேற்பாா்வையில், ப.சரவணன் (விழுப்புரம்), ஜெயக்குமாா் (கடலூா்), ரஜத் சதுா்வேதி (கள்ளக்குறிச்சி) உள்ளிட்ட 7 மாவட்டங்களைச் சோ்ந்த எஸ்.பி.க்கள், 10 கூடுதல் எஸ்.பி.க்கள், 20 டி.எஸ்.பிக்கள் மற்றும் போலீஸாா் என சுமாா் 2 ஆயிரம் போ் பாதுகாப்புப் பணியில் ஈடுபடுத்தப்பட்டுள்ளனா்.