1,100 கிலோ ரேஷன் அரிசி பறிமுதல்: ஒருவா் கைது

விழுப்புரம் அருகே பதுக்கி வைக்கப்பட்டிருந்த 1,100 கிலோ ரேஷன் அரிசியை போலீஸாா் பறிமுதல் செய்து, ஒருவரை கைது செய்தனா்.

வேலியம்பாக்கம் பகுதியில் ரேஷன் அரிசி மூட்டைகள் பதுக்கி வைக்கப்பட்டிருப்பதாக விழுப்புரம் குடிமைப்பொருள் வழங்கல் குற்றப்புலனாய்வு பிரிவு போலீஸாருக்கு தகவல் கிடைத்தது.

இதையடுத்து போலீஸாா் சனிக்கிழமை நிகழ்விடம் சென்று நடத்திய சோதனையில், அங்குள்ள ஒரு கொட்டகையில், 22 சாக்கு மூட்டைகளில் 1,100 கிலோ ரேஷன் அரிசி பதுக்கி வைக்கப்பட்டிருந்தது தெரியவந்தது. இதையடுத்து போலீஸாா் அந்த அரிசி மூட்டைகளை கைப்பற்றி விழுப்புரத்தில் உள்ள நுகா்பொருள் வாணிபக் கழக சேமிப்பு கிடங்கில் ஒப்படைத்தனா்.

தொடா்ந்து போலீஸாா் நடத்திய விசாரணையில் விழுப்புரம், வேலியம்பாக்கம் பகுதியைச் சோ்ந்த சக்கரவா்த்தி (55) என்பவா் சுற்று வட்டாரப் பகுதிகளில் பொதுமக்களிடமிருந்து ரேஷன் அரிசியை குறைந்த விலைக்கு வாங்கி, அதை தோசை மாவாக மதிப்புக் கூட்டி விற்பனை செய்வதற்காக பதுக்கி வைத்திருந்தது தெரியவந்தது. இதைத்தொடா்ந்து குற்றப் புலனாய்வு பிரிவு போலீஸாா் வழக்குப் பதிந்து, சக்கரவா்த்தியை கைது செய்தனா்.