பைக், கைப்பேசி திருடியவா் கைது

திருப்பத்தூா் அருகே பைக், கைப்பேசிகளை திருடியவரை போலீஸாா் கைது செய்தனா்.

திருப்பத்தூா் பொம்மிகுப்பம் பகுதியைச் சோ்ந்தவா் சேகா். இவா் ஞாயிற்றுக்கிழமை இரவு தனது பைக்கை வீட்டின் அருகே நிறுத்திவிட்டு வழக்கம்போல் தூங்கச் சென்றாா். திங்கள்கிழமை காலை எழுந்து வந்து பாா்த்தபோது பைக் காணவில்லை. மேலும், அவரது வீட்டில் சாா்ஜா் போட்டு இருந்த கைப்பேசியும் மாயமாகிவிட்டது.

அதேபோல் ஏழருவி பகுதியைச் சோ்ந்த மைதிலி பாபு என்பவரது வீட்டில் இருந்து கைப்பேசியை மா்ம நபா்கள் திருடிச் சென்றுள்ளனா். இது குறித்து சேகா் மற்றும் மைதிலி பாபு ஆகியோா் தனித்தனியாக கிராமிய காவல் நிலையத்தில் புகாா் அளித்தனா்.

அதன்பேரில், போலீஸாா் வழக்குப் பதிந்து அந்தப் பகுதியில் பொருத்தப்பட்டு இருந்த கண்காணிப்பு கேமராக்களை ஆய்வு செய்தபோது, ஏழருவி பகுதியைச் சோ்ந்த பன்னீா்செல்வம் அந்த இரு இடங்களில் நடைபெற்ற திருட்டுகளில் ஈடுபட்டது தெரியவந்தது.

அதையடுத்து, அவரை போலீஸாா் கைது செய்தனா். மேலும், அவரிடமிருந்து பைக் மற்றும் 2 கைப்பேசிகளையும் போலீஸாா் பறிமுதல் செய்தனா்.