மின் சாதன பொருள்கள் கடை உரிமையாளரிடம் ரூ.1.80 லட்சம் திருட்டு

வந்தவாசி அருகே மின் சாதன பொருள்கள் விற்பனைக் கடை உரிமையாளரிடமிருந்து ரூ.1.80 லட்சம் திருடுபோனது தொடா்பாக போலீஸாா் விசாரணை மேற்கொண்டுள்ளனா்.

வந்தவாசியை அடுத்த வடவணக்கம்பாடி கிராமத்தைச் சோ்ந்தவா் பிரபு (38). இவா், இதே கிராமத்தில் மின் சாதன பொருள்கள் விற்பனைக் கடை வைத்துள்ளாா்.

பிரபு இந்தக் கிராமத்தில் சொந்தமாக புதிய கடை கட்டி வருகிறாா். இவா், கடந்த மாா்ச் 20-ஆம் தேதி இரவு புதிதாக கட்டும் கடை முன் படுத்து தூங்கிக் கொண்டிருந்தாராம். அப்போது, ரூ.1.80 லட்சம் ரொக்கம் வைத்திருந்த கைப்பையை தலைக்கு அடியில் வைத்து தூங்கினாராம்.

இதை நோட்டமிட்ட மா்ம நபா்கள், அந்தப் பணத்தையும், அவரது கைப்பேசியையும் திருடிச் சென்றுள்ளனா். இதுகுறித்து பிரபு அளித்த புகாரின்பேரில், வடவணக்கம்பாடி போலீஸாா் வியாழக்கிழமை வழக்குப் பதிந்து விசாரணை மேற்கொண்டுள்ளனா்.