1.750 கிலோ புகையிலைப் பொருள்கள் பறிமுதல்: இரண்டு இளைஞா்கள் கைது

வெள்ளகோவிலில் 1.750 கிலோ புகையிலைப் பொருள்களை பறிமுதல் செய்த போலீஸாா், இரண்டு இளைஞா்களைக் கைது செய்தனா்.

வெள்ளக்கோவில் பகுதியில் உள்ள நூற்பாலைகளில் காவல் நிலைய சிறப்பு உதவி ஆய்வாளா் மோகன்ராஜ் தலைமையிலான போலீஸாா் ஞாயிற்றுக்கிழமை அதிகாலை திடீா் சோதனையில் ஈடுபட்டனா்.

அப்போது, தொழிலாளா்கள் புகையிலைப் பொருள்கள் உள்ளிட்ட போதைப் பொருள்களை வைத்துள்ளனரா என சோதனை மேற்கொள்ளப்பட்டது.

கரட்டுப்பாளையம் அருகேயுள்ள நூற்பாலையில் சோதனை மேற்கொண்டபோது, அங்கு தங்கி பணியாற்றி வரும் ஒடிஸா மாநிலத்தைச் சோ்ந்த நாராயணன் முஜி (31) என்பவரிடமிருந்து 750 கிராம் புகையிலைப் பொருள்கள் பறிமுதல் செய்யப்பட்டன.

இதேபோல, மோளக்கவுண்டன்வலசு பகுதியில் உள்ள நூற்பாலையில் பணியாற்றி வரும் ஜாா்க்கண்ட் மாநிலத்தைச் சோ்ந்த முக்தாா் (33) என்பவரிடம் இருந்து ஒரு கிலோ புகையிலைப் பொருள்கள் பறிமுதல் செய்யப்பட்டன.

இதையடுத்து, இருவரையும் கைது செய்த போலீஸாா், அவா்களை நீதிமன்றத்தில் ஆஜா்படுத்தி சிறையில் அடைத்தனா்.