பாலக்கோட்டில் வீதிவீதியாக நடந்துசென்று வாக்கு சேகரித்த முதல்வா் மு.க.ஸ்டாலின்

தருமபுரி மாவட்டம், பாலக்கோடு தொகுதியில் போட்டியிடும் திமுக வேட்பாளா் டிஎன்வி எஸ். செந்தில்குமாருக்கு ஆதரவு கோரி வீதிவீதியாக நடந்துசென்று முதல்வா் மு.க. ஸ்டாலின் புதன்கிழமை வாக்கு சேகரித்தாா்.

தருமபுரி மாவட்டத்தில் தருமபுரி, பாலக்கோடு, பென்னாகரம், பாப்பிரெட்டிப்பட்டி, அரூா் (தனி) ஆகிய ஐந்து சட்டப் பேரவைத் தொகுதிகள் உள்ளன. திமுக கூட்டணி சாா்பில் தருமபுரி தொகுதியில் தேமுதிக வேட்பாளா் மருத்துவா் வி. இளங்கோவன், பென்னாகரம் தொகுதியில் காங்கிரஸ் கட்சி சாா்பில் ஜி.கே.எம். தமிழ்க்குமரன் போட்டியிடுகின்றனா்.

பாலக்கோடு தொகுதியில் திமுக வேட்பாளா் மருத்துவா் டிஎன்வி எஸ். செந்தில்குமாா், பாப்பிரெட்டிப்பட்டியில் முன்னாள் அமைச்சா் பி. பழனியப்பன், அரூரில் அ. சண்முகம் ஆகியோா் போட்டியிடுகின்றனா்.

இந்த வேட்பாளா்களுக்கு ஆதரவு கோரி தருமபுரி தடங்கத்தில் புதன்கிழமை நடைபெறும் பிரசாரக் கூட்டத்தில் பங்கேற்பதற்காக செவ்வாய்க்கிழமை இரவு முதல்வா் மு.க. ஸ்டாலின் தருமபுரி வந்தாா். தொடா்ந்து புதன்கிழமை காலை தருமபுரியிலிருந்து வாகனம் மூலம் பாலக்கோடு சென்று, அங்கு இஸ்லாமிய மக்கள் வசிக்கும் கோட்டை பகுதியில் வீதிவீதியாக நடந்துசென்று பொதுமக்களிடம் வேட்பாளா் டிஎன்வி எஸ். செந்தில்குமாருக்கு ஆதரவு கோரி வாக்கு சேகரித்தாா்.

அப்போது, அத்தெருவில் வசிக்கும் பாக்கு வியாபாரி மோதிகான்- பாா்த்திமா வீட்டிற்கு சென்று அவா்களிடம் நலம் விசாரித்த முதல்வா், மகளிா் உரிமைத் தொகை, விடியல் பயணத் திட்டம் குறித்தும், ஆட்சியில் ஏதேனும் குறைகள் உள்ளனவா என்றும் கேட்டறிந்தாா். தொடா்ந்து அவா்களோடு சுயபடம் எடுத்துக்கொண்டாா்.

பேருந்து நிலையத்தில் வாக்கு சேகரிப்பு

இதையடுத்து, கோட்டை பகுதியில் இருந்து பாலக்கோடு பிராதான சாலை வழியாக பேருந்து நிலையம் சென்று பொதுமக்களிடம் வாக்கு சேகரித்தாா். மேலும், அங்கிருந்த பெற்றோரின் கோரிக்கையை ஏற்று, அவா்களது குழந்தைக்கு திராவிடன் என பெயா்சூட்டினாா்.

மேலும், பேருந்து நிலையத்தில் நின்றிருந்த நகா்ப்புற பேருந்தில் ஏறி, பயணிகளிடம் உரையாடி வாக்கு சேகரித்தாா். இதையடுத்து, பாலக்கோடு பேருந்து நிலையத்தின் முகப்பில் இருந்த தேநீா் கடைக்கு வேட்பாளா்களுடன் சென்று தேநீா் பருகினாா். அதன்பிறகு அங்கிருந்து காரில் தருமபுரிக்குச் சென்றாா்.