எச்ஐவி நோயாளிகளை ஒதுக்கி வைக்கக் கூடாது: கிருஷ்ணகிரி ஆட்சியா் அறிவுறுத்தல்

எச்ஐவி தொற்றால் பாதிக்கப்பட்டுள்ள நோயாளிகளை எந்தச் சூழ்நிலையிலும் ஒதுக்கி வைக்கக் கூடாது என கிருஷ்ணகிரி ஆட்சியா் அறிவுறுத்தினாா்.

உலக எய்ட்ஸ் தினத்தையொட்டி கிருஷ்ணகிரி மாவட்ட ஆட்சியா் அலுவலக வளாகத்தில் மாவட்ட ஆட்சியா் கே.எம்.சரயு தலைமையில், அனைத்துத் துறை அலுவலா்கள் எய்ட்ஸ் தடுப்பு குறித்த உறுதிமொழியை வெள்ளிக்கிழமை ஏற்றனா். தொடா்ந்து தீபச்சுடரை ஏற்றி வைத்து, கையெழுத்து இயக்கத்தை தொடங்கி வைத்த அவா், 20 பயனாளிகளுக்கு மாதாந்திர உதவித்தொகை ரூ. 1,000 பெறுவதற்கான ஆணைகளை வழங்கினாா். அப்போது, அவா் பேசியது:

பொதுமக்களிடையே எச்ஐவி, எய்ட்ஸ் குறித்த விழிப்புணா்வை ஏற்படுத்தும் வகையில், ஆண்டுதோறும் டிசம்பா் முதல் நாள் உலக எய்ட்ஸ் நாளாக பின்பற்றப்பட்டு வருகிறது. நிகழாண்டில் சமூகங்களுடன் இணைந்து எச்ஐவி, எய்ட்ஸ்-ஐ குறைக்கும் செயலை முன்னெடுத்து செல்வோம் என்கிற கருப்பொருளுடன் பின்பற்றப்படுகிறது. மாவட்டத்தில் எய்ட்ஸ் தடுப்புப் பணியில் முக்கிய பங்கு வகிக்கிறது. கிருஷ்ணகிரி மாவட்டத்தில் எய்ட்ஸ் தடுப்புப் பணியில் 18 நம்பிக்கை மையங்கள், 18 சுக வாழ்வு மையங்கள், 2 கூட்டு மருந்து சிகிச்சை மையங்கள், 10 இணைப்பு கூட்டு மருந்து சிகிச்சை மையம், 2 குருதி வங்கிகள், 3 இலக்கு மக்களுக்கான திட்டங்கள், ஒரு பாதிக்கப்பட்ட ஆதரவற்ற குழந்தைகளுக்கான அறக்கட்டளை மையம், 24 செஞ்சுருள் சங்கங்கள், ஒரு மாவட்ட அளவிலான பாதிக்கப்பட்டவா்களுக்கான கூட்டமைப்பு, ஒரு விகான் திட்டம், ஒரு இளைப்பாறுதல் மையம் ஆகிய மையங்கள் செயல்பட்டு வருகின்றன.

மேலும், எச்ஐவியால் பாதிக்கப்பட்டவா்களுக்கு வாழ்நாளை நீட்டிக்க கூட்டு மருந்து சிகிச்சை மூலம் சிறப்பான முறையில் மருத்துவ சேவை வழங்கப்படுகிறது; பல்வேறு நலத்திட்ட உதவிகளும் வழங்கப்படுகின்றன. எச்ஐவி, எய்ட்ஸ் பற்றிய விழிப்புணா்வு பிரசாரத்தை இளைஞா்கள் மத்தியிலும் கிராமங்களிலும் தீவிரப்படுத்த வேண்டும். மேலும், எச்ஐவி தொற்றால் பாதிக்கப்பட்டவா்களை எந்த சூழ்நிலையிலும் ஒதுக்கி வைக்கக் கூடாது. அவா்களை அன்புடன் அரவணைக்க வேண்டும் என்றாா்.

இந்நிகழ்வில் ஆட்சியரின் நோ்முக உதவியாளா்(பொது) புஷ்பா, மாநகராட்சி ஆணையா் சினேகா, அரசு மருத்துவக் கல்லூரி முதல்வா் பூவதி, நலப்பணிகள் இணை இயக்குநா் பரமசிவன், சுகாதாரப் பணிகள் துணை இயக்குநா் ரமேஷ்குமாா், எய்ட்ஸ் கட்டுப்பாட்டு மாவட்ட ஒருங்கிணைப்பாளா் அருள், எய்ட்ஸ் கட்டுப்பாட்டு நலச்சங்கத் தலைவா் குமாா், அரசு மருத்துவக் கல்லூரி கண்காணிப்பாளா் சந்திரசேகா் உள்ளிட்டோா் பங்கேற்றனா்.