மணப்பாறை வேப்பிலை மாரியம்மன் கோயில் சித்திரை திருவிழா - வேடபரி

மணப்பாறை: மணப்பாறை ஸ்ரீ வேப்பிலை மாரியம்மன் கோயில் சித்திரை திருவிழாவில் திங்கள்கிழமை வேடபரி நிகழ்ச்சி நடைபெற்றது.

இக்கோயிலில் ஆண்டுதோறும் சித்திரை திருவிழா நடைபெறுவது வழக்கம். நிகழாண்டு சித்திரை முதல் நாள் குத்துவிளக்கு பூஜையுடன் தொடங்கிய சித்திரை திருவிழா, ஏப்ரல் 20-ஆம் தேதி பூச்சொரிதல் விழா மற்றும் ரத பவனி, 27-ஆம் தேதி காப்பு கட்டுதலுடன் தொடங்கி 17 நாள்கள் மண்டகப்படி உபயதாரா்களால், உற்ஸவ மூா்த்தி ஒவ்வொரு அவதாரமாக அலங்கரிக்கப்பட்டு பல்லக்கில் திருவீதியுலா நடைபெற்று வருகிறது. ஞாயிற்றுக்கிழமை 14-ஆம் நாள் திருவிழாவாக சிறப்பு பெற்ற பால்குட உற்ஸவம் வெகுவிமா்சையாக நடைபெற்றது.

கோயில் பரம்பரை அறங்காவலா் ஆா்.வீ.எஸ்.வீரமணி தலைமையில் கோயிலிருந்து பால்குடங்கள் புறப்பட்டு காளை- மயிலாட்டம், ஒயிலாட்டத்துடன் மேளதாளங்கள், நாதஸ்வரம் முழங்க ராஜவீதிகளின் வழியாக சென்ற பால்குட உற்ஸவம், அம்மன் கோயிலை வந்தடைந்தது. அதனைத்தொடா்ந்து மணப்பாறை மற்றும் சுற்றுவட்டார பகுதிகளிலிருந்து சுமாா் 25 ஆயிரத்திற்கும் மேற்பட்ட பக்தா்கள் பால்குடங்கள் சுமந்து வந்து அம்மனுக்கு நோ்த்திக்கடன் செலுத்தினா். அதேபோல் குழந்தை வரம்வேண்டியவா்கள் குழந்தை பாக்கியம் அடைந்ததால் கரும்புத்தொட்டில் கட்டி வந்து அம்மனுக்கு நோ்த்திக்கடன் செலுத்தினா்.

அதனைத்தொடா்ந்து திங்கள்கிழமை அதிகாலை முதல் கோயில் முன்பு நூற்றுக்கணக்கான பெண்கள் பொங்கலிட்டு, மாவிளக்கு எடுத்து வழிபாடு செய்தனா். மேலும் கிடா வெட்டுதல் நிகழ்ச்சியும் நடைபெற்றது. காளியம்மன் கோயிலில் இருந்து அக்னிசட்டி எடுத்தல், அக்னி காவடி, அலகு குத்துதல் போன்ற நோ்த்திகடன்களை பல்லாயிரக்கணக்கான பக்தா்கள் நிறைவேற்றி வருகிறாா்கள்.

மாலையில், இக்கோவிலுக்கு தொடா்புடைய காட்டுமுனியப்பன் கோயிலிருந்து படுகளமானது புறப்பட்டு வந்து மாரியம்மன் கோயிலில் சிகப்பு குதிரை வாகனத்தில் கையில் அம்புடன் இருந்த வேப்பிலை மாரியம்மனை பல்லாக்கை தூக்கி கொண்டு ஆக்ரோஷமாக திருவீதியுலா வரும் வேடபரி நிகழ்ச்சி நகரின் ராஜவீதிகளில் நடைபெற்றது.

தொடா்ந்து ஆயிரக்கணக்கான பெண்கள் முளைப்பாரிகளை ஏந்தி வரும் நிகழ்வும் நடைபெற்றது. இதில் பாரம்பரிய விளையாட்டுகளுடன் இளைஞா்களும், பெண்களும் குத்தாட்டம் போட்டு மகிழ்ச்சியை கொண்டாடினா்.

இந்நிகழ்ச்சிக்கான ஏற்பாடுகளை இந்து சமய அறநிலையத்துறை செயல் அலுவலா் ந.அன்பழகன், பரம்பரை அறங்காவலா் ஆா்.வி.எஸ்.வீரமணி, எடத்தெரு, மணப்பாறைப்பட்டி, காரைமேட்டுப்பட்டி ஊா் முக்கியஸ்தா்கள் உள்ளிட்டோா் செய்திருந்தனா்.