ஆடுகளைத் திருட  முயன்ற 3 பேர் கைது

கரூர் மாவட்டம் கடவூர் அருகே தோட்டத்திற்குள் புகுந்து ஆடுகளை திருட முயன்ற 3 பேரைப் போலீஸார் கைது செய்தனர்.
கடவூர் அடுத்த தந்துவார்பட்டியைச் சேர்ந்தவர் காளியப்பன். இவர், அதே பகுதியில் தனது தோட்டத்தில் ஆட்டுக்கொட்டகை அமைத்து ஆடுகள் வளர்த்து வருகிறார். சனிக்கிழமை இரவு இவரது தோட்டத்திற்குள் புகுந்த மர்ம நபர்கள் ஆடுகளைத் திருட முயன்றனர். 
அப்போது ஆடுகளின் அலறல் சப்தம் கேட்டு அங்கு வந்த காளியப்பன் ஆடுகளைத் திருட முயன்ற மர்மநபர்களைப் பார்த்து "திருடன், திருடன்' என சப்தமிட்டார். இதனால் அப்பகுதியினர் ஓடி வந்து திருடர்களைப் பிடித்து பாலவிடுதி போலீஸில் ஒப்படைத்தனர். விசாரணையில், கடவூர் அடுத்த துளிப்பட்டியைச் சேர்ந்த பழனியாண்டி(65), பசுபதி, பாலகிருஷ்ணன் ஆகியோர் எனத் தெரியவந்தது. போலீஸார் மேற்கொண்டு விசாரிக்கின்றனர்.