பழநி முருகன் கோயில் சிலை வழக்கு: இருவரது ஜாமீன் மனு தள்ளுபடி

பழநி முருகன் கோயில் சிலை முறைகேடு வழக்கில் கைது செய்யப்பட்ட இருவரின் ஜாமீன் மனுக்களை கும்பகோணம் நீதிமன்றம் புதன்கிழமை தள்ளுபடி செய்தது.
திண்டுக்கல் மாவட்டம் பழநி தண்டாயுதபாணி சுவாமி கோயிலில் நவபாஷாண மூலவர் சிலையை புதிதாக வடிவமைத்ததில் முறைகேடு நிகழ்ந்ததாகக் கோயிலின் முன்னாள் இணை ஆணையர் கே.கே. ராஜா (66), சிலையை வடிவமைத்த முத்தையா ஸ்தபதி (77) ஆகியோரை  சிலை கடத்தல் தடுப்புப் பிரிவு போலீஸார் மார்ச் 24-ம் தேதி கைது செய்து, திருச்சி மத்திய சிறையில் அடைத்தனர். இந்நிலையில், இந்த வழக்கு ஏப். 2-ம் தேதி சிபிசிஐடி பிரிவுக்கு மாற்றப்பட்டது. ராஜா, முத்தையா ஸ்தபதி ஜாமீன் கேட்டு ஏப். 2-ம் தேதி கும்பகோணம் நீதிமன்றத்தில் மனு அளித்தனர். இதுதொடர்பாக புதன்கிழமை நடைபெற்ற விசாரணையில் இந்தமனு தள்ளுபடி செய்யப்பட்டது.