நவ.9-இல் திருச்சி வரும் ஸ்டாலினுக்கு வரவேற்பு

துறையூரில் நடைபெறவுள்ள திருமண விழாவில் பங்கேற்பதற்காக வெள்ளிக்கிழமை (நவ.9) திருச்சி வருகை தரும் திமுக தலைவர் மு.க.ஸ்டாலினுக்கு சிறப்பான வரவேற்பு அளிக்கப்பட உள்ளது.
இதுகுறித்து திமுக வடக்கு மாவட்டச் செயலாளர் காடுவெட்டி ந.தியாகராஜன் ஞாயிற்றுக்கிழமை வெளியிட்ட அறிக்கை: துறையூரில் அத்தொகுதி சட்டப்பேரவை உறுப்பினர் செ.ஸ்டாலின்குமார் திருமண விழா நவ.9ஆம் தேதி நடைபெறுகிறது. இதில் பங்கேற்க வருகை தரும் திமுக தலைவர் மு.க.ஸ்டாலினுக்கு, நெ.1. டோல்கேட்டில் சிறப்பான வரவேற்பு அளிக்கப்படுகிறது. அதேபோல, சமயபுரம், துறையூர் பேருந்து நிலையம் அண்ணாசிலை அருகிலும் வரவேற்பு அளிக்கப்பட உள்ளது. திமுக தலைவர் மு.க.ஸ்டாலினுடன், தெற்கு மாவட்டச் செயலாளர் கே.என்.நேரு உள்ளிட்டோர் பங்கேற்க இருப்பதால், கட்சி நிர்வாகிகள் திரளாகப் பங்கேற்க வேண்டும்.