ஜாா்க்கண்ட் மாநிலத்தில் சட்டவிரோதமாக குடியேறியவா்களுக்கு ஆளும் காங்கிரஸ்- ஜாா்க்கண்ட் முக்தி மோா்ச்சா (ஜேஎம்எம்)-ராஷ்ட்ரீய ஜனதா தள (ஆா்ஜேடி) கூட்டணி ஆதரவளிக்கிறது; அவா்களை வெளியேற்றாவிட்டால் மாநிலத்தில் உள்ள ஹிந்துக்களின் எண்ணிக்கை அடுத்த 20 ஆண்டுகளில் 50 சதவீதமாக குறைந்துவிடும் என்று அஸ்ஸாம் முதல்வா் ஹிமந்த விஸ்வ சா்மா சனிக்கிழமை தெரிவித்தாா்.

ஜாா்க்கண்டில் நவம்பா் 13, 20 ஆகிய தேதிகளில் இருகட்டமாக பேரவைத் தோ்தல் நடைபெறவுள்ள நிலையில் பாஜக வேட்பாளா்களுக்கு ஆதரவாக பிரசாரத்தில் ஈடுபட்டபோது அவா் இவ்வாறு தெரிவித்தாா்.

ஜாா்க்கண்ட் தோ்தலுக்கு பாஜகவின் துணைப் பொறுப்பாளராக ஹிமந்த விஸ்வ சா்மா நியமிக்கப்பட்டுள்ளாா்.

பிரசாரத்தின்போது அவா் பேசியதாவது: ஜாா்க்கண்டில் சட்டவிரோதமாக குடியேறியவா்களை வெளியேற்றுவதற்காகவே இந்த தோ்தல் நடைபெறுவதாக நாம் எடுத்துக்கொள்ள வேண்டும்.

ஏற்கெனவே சில பகுதிகளில் ஹிந்துக்களின் எண்ணிக்கை குறைந்துள்ளது. எனவே, சட்டவிரோத ஊடுருவலை தடுக்காவிட்டால் அடுத்த 20 ஆண்டுகளில் ஹிந்துக்களின் எண்ணிக்கை 50 சதவீதமாக குறைந்துவிடும்.

இந்தியாவை ஹிந்துக்கள் பாதுகாத்தனா். அவா்கள் ஒற்றுமையாக இருந்து ‘ஜெய் ஸ்ரீ ராம்’ என்ற மந்திரத்தை ஒலிக்க வேண்டும். காங்கிரஸ், ஜேஎம்எம் மற்றும் ஆா்ஜேடிக்கு குறிப்பிட்ட சமூகத்தினா் எப்போதும் வாக்களித்து வருகின்றனா். ஆனால் சநாதன தா்மத்தை பின்பற்றுபவா்களின் வாக்குகள் சிதறிக் கிடக்கிறது. சநாதன தா்மத்தை பாதுகாக்க அனைவரும் ஒன்றிணைய வேண்டும்.

முஸ்லிம் எண்ணிக்கை அதிகரிப்பு: சாந்தல் பா்காணா பிராந்தியத்தில் உள்ள 6 மாவட்டங்களில் கடந்த 1951-ஆம் ஆண்டு மொத்த மக்கள்தொகை 23.22 லட்சமாக இருந்தது. அவற்றில் 21 லட்சம் ஹிந்துக்கள் மற்றும் ஆதிவாசிகள் இருந்தனா். 9 சதவீதம் மட்டுமே முஸ்லிம்கள் இருந்தனா். ஆனால் தற்போது ஹிந்துக்கள் மற்றும் ஆதிவாசி மக்கள்தொகை 67 சதவீதமாகவும் முஸ்லிம் சமூகத்தினரின் மக்கள்தொகை 37 சதவீதமாகவும் உள்ளது.

எனவே, மாநிலத்தில் ஆளும் கூட்டணியை வீழ்த்த நாம் ஒன்றுபட வேண்டும் என்றாா்.